Қашқадарё вилояти Китоб шаҳрида Nexia русумли транспорт воситасининг орқа томонига ўрнатилган давлат рақами белгисини ечиб, ўрнига ўз исми ёзилган қоғозни ёпиштириб олган ҳайдовчи жаримага тортилди. Бу ҳақда ИИВ ЙҲХББ ахборот хизмати хабар берди.
Кадр: Telegram
Маълумотларга кўра, Юсуф Аҳмаджонов исмли Nexia-2 автомобили ҳайдовчиси машинанинг орқа давлат рақамини ўзбошимчалик билан ечиб олиб, ўзининг исми — Юсуф номини қоғозга ёзиб, Китоб шаҳри ҳудудида транспорт воситасини бошқариб юрган ҳолати аниқланган.
Аниқланган ҳолат юзасидан Маъмурий жавобаргарлик тўғрисидаги кодексининг 125-моддаси (транспорт воситаларидан фойдаланиш қоидаларини бузиш) бўйича маъмурий баённома расмийлаштириб, базавий ҳисоблаш миқдорининг 10 баробари миқдорида жарима белгиланган, транспорт воситаси вақтинча сақлаш учун жарима майдончасига жойлаштирилган.
«Барча ҳайдовчилардан белгиланган қоидаларга риоя қилишларини, бошқарувидаги транспорт воситасининг давлат рақам белгисини ўзбошимчалик билан ечиб ҳаракатланмасликларини ҳамда давлат рақам белгисини ўзга усулларда ўзгартириб автомашина бошқармасликларини сўраб қоламиз», — дейилади ЙҲХББ хабарида.
Аввалроқ TikTok видеосервисига автомобиль давлат рақамини яширувчи автоматлаштирилган пардача видеосини жойлаштирган тошкентлик ҳайдовчи жаримага тортилгани тўғрисида хабар берилганди.
