«Қизилқум» бош мураббийи Ҳамиджон Актамов Coca-Cola Суперлига 14-тури доирасида «Насаф»га қарши кечган баҳсдаги мағлубиятдан (0:4) кейин ўз фикрлари билан ўртоқлашди.
Билмадим... Биринчи бўлимда ҳакам бир неча хатоларга йўл қўйди, билмадим, ҳакамнинг бизда қасди борми?! Ўтган турда ҳам ҳакамларнинг қурбони бўлдик. Тезроқ VAR’ни олиб келиш керак. Тўғри, ҳимоядаги хато сабабли 3-дақиқадаёқ гол ўтказиб юбордик, бироқ тезда жавоб қайтаргандик. Ҳакамлар эса голни инобатга олмади. Кўрмаган эмиш... Нариги томондаги ҳакам эса вазиятни ҳал қиляпти. Мен ҳам кўриб, эшитиб турибман-ку. Менинг ёнимдаги ҳакам нариги ярим майдондаги вазиятга аралашяпти. Ўтган даврада Намангандаги ўйинда ҳам дарвозамизга йўқ жойдан пенальти белгиланганди. Ҳакамлар бизни ёмон кўрадими дейман. Эркин Бойдуллаевга қарши яққол қоида бузилишида ҳам ҳакам ўйинни тўхтатмади. Кўп жойларда ҳуштакциз ўйинлар бошланиб кетди. Ҳакамлар жуда кўп хатоликка йўл қўйди. Улар биринчи бўлимнинг ўзида бизни синдирди. Футболчиларга ҳам йўқ жойдан сариқ карточкалар берилди.Биринчи бўлим бурчак зарбасидан кейин юзага келган вазиятда «Насаф» ҳимоячиси тўпни дарвоза чизиғи устида қайтариб юборди, мазкур ҳолат меҳмонлар шикоятига сабаб бўлди.Ҳакамларнинг ғалати қарорлари футболчиларимнинг руҳиятига таъсир қилди. Тўғри, хатолар йўқ эмас. Баҳс юқори темпда ўтди, «Насаф» кучли ўйнади. Лекин биз ҳам бунчалик йирик ҳисобга лойиқ эмасдик.
Ўйинга яхши тайёрлангандик. Ҳакам эса бизни жуда эрта синдирди. Кўриб туриб, тушунмаяпман. Нега? Нима сабабдан? Биз бундай натижага лойиқ эмасдик.
«Қизилқум»нинг инобатга олинмаган голи йирик ҳисоб бўлиб кетишига таъсир кўрсатдими? Албатта, таъсир кўрсатди. Футболчи меҳнат қиляпти, югуряпти. Иккинчи голга ҳам яқин келгандик. Фол бўлган пайтда ҳакам 3 метрдан туриб олиб, ўйинни давом эттиришни талаб қиляпти. Қачонгача ҳакамлар шундай қилаверади, билмадим.
«Насаф» жамоасининг келажаги жуда порлоқ. Йигитларнинг омадини берсин. Кучеренко академиядан зўр футболчиларни етиштириб беряпти. Шу одам касалхонада бетоб бўлиб ётган экан. Тезроқ тузалиб, ишга қайтишини тилаб қоламан. Шундай натижаларда Кучеренконинг қилган фаолияти кўринади.
Ҳамиджон Актамов, «Қизилқум» бош мураббийи
«Қизилқум» 14-турдан кейин 10 очко билан 11-ўринда бормоқда. Жамоа кейинги турда «Сурхон» билан ўйнайди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)