Японияда маҳаллий Peach Aviation авиакомпаниясига тегишли самолёт тиббий ниқоб тақишдан бош тортган йўловчи сабаб фавқулодда қўнишни амалга оширди, деб хабар беради NHK телекомпанияси.
Бортида 124 йўловчи бўлган ҳаво кемаси Хоккайдо провинцияси шимолидаги Кусиро аэропортидан мамлакат ғарбидаги Кансай аэропортига учаётган бўлган. Парвоздан сўнг самолёт экипажи йўловчилар орасида ниқоб тақмаган эркакни пайқаб қолган.
Компания ходимлари қоидабузардан хавфсизлик чораларига риоя қилишни сўраган, бироқ у бунга рози бўлмаган. Бундан ташқари, йўловчи у билан ёнма-ён ўтиришни истамаган бошқа йўловчиларга бақириб, экипаж аъзолари номига огоҳлантириш хати юбориш билан таҳдид қилган.
Шундан сўнг экипаж капитани самолётни Япон денгизи қирғоғидаги Ниигата аэропортига қўндиришга қарор қилган. Мамлакат Транспорт вазирлигининг таъкидлашича, бу ниқоб билан боғлиқ муаммо сабаб юзага келган биринчи режасиз қўниш ҳисобланади.
Фавқулодда қўниш амалга оширилганидан сўнг, йўловчилар белгиланган манзилига етказилган. Улар Кансайга бир суткадан кўпроқ кечикиб келган.
Аввалроқ Аmerican Airlines ниқоб тақишдан бош тортган йўловчига ушбу авиакомпания рейсида учишни тақиқлаб қўйган эди.
Изоҳ (0)