ИИВ ҳузуридаги Тергов департаменти Жиззах вилояти Шароф Рашидов туманида содир бўлган йўл транспорт ҳодисасининг дастлабки тафсилотларини маълум қилди.
Хабарга кўра 2020 йилнинг 9 сентябрь куни соат тахминан 18:30 да Шароф Рашидов тумани «Хайробод» МФЙ ҳудудидан ўтган М-39 автомобиль йўлида 2 та Lacetti ҳамда KIA юк машинаси иштирокида ЙТҲ содир бўлган.
Тошкент—Самарқанд йўналишининг 997 километрида келаётган Lacetti катта тезликда ҳаракатланиб, шу йўналишдаги бошқа бир Lacetti’ни чап ён томонига урилган ва йўлни бўлиб турган бетон тўсиқни бузиб ўтиб, қарама-қарши йўналишдаги KIA русумли юк машинаси билан тўқнашган.
Бирламчи маълумотларга кўра, катта тезликда ҳаракатланиб келган Lacetti машинасида ёнғин келиб чиққан. Машина ичида бўлган ҳайдовчи ва бир нафар йўловчи ҳодиса жойида вафот этган, қолган 3 нафар йўловчи тиббий муассасасига ётқизилган. Иккинчи Lacetti йўл четига ағдарилган, автомашинада бўлган ҳайдовчи ва йўловчига шикаст етмаган. KIA юк машинасининг ҳайдовчиси ҳам тан жароҳатлари олмаган.
Ҳодиса жойида тергов-тезкор гуруҳи ишламоқда. Ҳодиса юзасидан қўшимча маълумот берилади, дейилган департмент хабарида.
Жиззах вилоятида инсон ўлими билан боғлиқ йўл транспорт ҳодисалари тез-тез содир бўлиб туради. Хусусан, 25 августда Жиззах вилоятида автобус ва юк машинаси иштирокида юз берган йўл-транспорт ҳодисаси оқибатида юк машинаси ҳайдовчиси ва унинг йўловчиси вафот этган, 2 сентябрь куни Ғалларол туманида мотоциклнинг Spark билан тўқнашиши оқибатида 52 ёшли ҳайдовчи ҳалок бўлган, 3 сентябрь куни Жиззах шаҳри ҳудудидан ўтувчи 4Р38 Учтепа—Жиззах—Бахмалсой автомобиль йўлида содир бўлган ЙТҲ оқибатида йўловчилардан бири – 33 ёшли Ж.И. оғир тан жароҳатлари олиб шифохонада вафот этган.
Изоҳ (0)