«Ер ҳисоби ва давлат кадастрларини юритиш тизимини тубдан такомиллаштириш чора-тадбирлари тўғрисида»ги Президент фармони ва «Ўзбекистон Республикаси Давлат солиқ қўмитаси ҳузуридаги Кадастр агентлиги фаолиятини ташкил этиш чора-тадбирлари тўғрисида»ги Президент қарорига кўра кадастр органлари Давлат солиқ қўмитасининг тизимига ўтказилди.
Қарор билан Ўзбекистон Республикаси Ер ресурслари, геодезия, картография ва давлат кадастри давлат қўмитаси негизида Ўзбекистон Республикаси Давлат солиқ қўмитаси ҳузуридаги Кадастр агентлиги (кейинги ўринларда – Кадастр агентлиги) ташкил этилди.
Қуйидагилар Кадастр агентлигининг асосий вазифалари ҳамда фаолият йўналишлари этиб белгилансин:
а) кўчмас мулкка бўлган ҳуқуқларни давлат рўйхатидан ўтказиш соҳасида:
- кўчмас мулкка бўлган ҳуқуқларни давлат рўйхатидан ўтказиш соҳасида ягона давлат сиёсатининг амалга оширилишини таъминлаш;
- кўчмас мулкка бўлган ҳуқуқларни давлат рўйхатидан ўтказиш;
- давлат ер кадастри, бинолар ва иншоотлар давлат кадастрини юритиш;
- кўчмас мулкка бўлган ҳуқуқларнинг давлат рўйхатидан ўтказилишини таъминлашга ва ер участкаларининг ўзбошимчалик билан эгаллаб олинишига йўл қўймасликка қаратилган самарали ер назоратини амалга ошириш;
- геодезия ва картография соҳасида ягона давлат сиёсатининг амалга оширилишини таъминлаш;
- аэрокосмик суратга олиш, топография-геодезия, картографияга оид изланишлар ҳамда тадқиқотларни, ерларни масофадан зондлаш, геодинамик тадқиқотлар маълумотлари ва материалларидан фойдаланган ҳолда картографик мониторингни амалга ошириш;
- давлат картография-геодезия кадастрини юритиш;
- давлат геодезия назоратини амалга ошириш;
- давлат кадастрларини юритиш соҳасида ягона давлат сиёсатининг амалга оширилишини таъминлаш;
- давлат бошқаруви органлари ва маҳаллий давлат ҳокимияти органларининг давлат кадастрларини юритиш соҳасидаги фаолиятини мувофиқлаштириш;
- давлат кадастрлари ягона тизимини юритиш, ҳудудларда давлат кадастрининг самарали юритилишини таъминлаш;
- давлат кадастрларини юритиш тартибларига риоя қилинишини таъминлашга қаратилган самарали кадастр назоратини амалга ошириш;
д) кўчмас мулкка бўлган ҳуқуқларни давлат рўйхатидан ўтказиш, геодезия, картография ва давлат кадастрларини юритиш соҳасида кадрларни қайта тайёрлаш ва уларнинг малакасини оширишни таъминлаш.
«Кадастр идорасининг асосий вазифаси – давлат кадастрлари ягона тизимига кирувчи 21 та давлат кадастрининг тўлиқ ва ишончли юритилишини таъминлаш. Ўзбекистондаги барча ерлар, уларнинг остида ва устида қандай объектлар борлиги ҳақида ягона базани шакллантириш. Солиқ идоралари мазкур базанинг тўлиқ юритилишидан манфаатдор. Чунки ҳар қандай объект у ёки бу маънода солиқ солиш объекти ҳисобланади. Унинг солиқ солиш объектига кирмаслигини, масалан, тарихий-маданий объект, муҳофаза қилинадиган табиий ҳудуд эканлигини тасдиқлаш учун ҳам кадастр маълумотлари керак бўлади.
Ерлар, бино ва иншоотлар, бошқа кадастр объектларининг ҳақиқий ҳисобини билиш учун кадастр ва солиқ идораларининг ресурсларини бирлаштириш керак, уларнинг ахборот тизимларини интеграция қилиш лозим.
Орадан яна йиллар ўтиб, барча объектлар ҳисоби юритилгач, сунъий йўлдош орқали ҳар бир ўзгаришни дарҳол аниқлаш имконияти яратилиши, барча давлат органларининг ахборот тизимлари реал вақт режимида бир-бири билан ахборот алмашишни бошлагач кадастр ва солиқ органлари яна ўз мустақил йўналишларида фаолиятларини давом эттиришиши мумкин. Лекин ҳозирги босқичда бу икки идора фаолиятини биргаликда олиб бориши давлат, жамият, солиқ тўловчилар ва мулкдорлар учун фақат фойда, қулайлик ва қўшимча имкониятлар яратади, бунга ҳеч қандай шубҳа йўқ», – дейилади Давергеодезкадастр хабарида.
2020 йил июнь ойида Адлия вазирлигининг Давлат хизматлари агентлиги томонидан ўтказилган ўрганишлар давомида ваколатли ташкилотлар томонидан «Ерелектрон» ААТ орқали ер участкаларини олиш учун хулоса беришда 2,3 мингдан ортиқ қонун бузилиши ҳолатларига йўл қўйилгани аниқланган.
17 июль куни «Давергеодезкадастр» тизимидаги 9 нафар раҳбар эгаллаб турган лавозимидан озод этилган, кейинчалик 24 июлда 15 кун давомида «Давергеодезкадастр» қўмитаси тизимидаги 34 нафар раҳбар ва ходим лавозимидан бўшатилгани хабар қилинган.
Изоҳ (0)