«Бепул клиникалар ҳақида гапирмаяпман, ҳатто пулга ҳам бўш койка топиш қийин». Тошкентда коронавирусдан даволанаётган «Навбаҳор» бош мураббийи Андрей Канчельскис интервьюси

Вирус

— Андрей, ўзингизни қандай ҳис қиляпсиз?

— Раҳмат, ҳозир яхши. Пайшанба кунидан (3 сентябрдан изоҳ — «Дарё») бошлаб касалхонада даволанмоқдаман. Таблеткалар, уколлар.

— Уколлар кўпми?

— Кунига уч марта. Коронавирус учун ижобий тестдан ўтганимдан сўнг тўғри касалхонага боришни хоҳладим. Аммо ҳозирда Тошкентда бу борада қийинчиликлар мавжуд.

— Касалланганлар шу даражада кўпми?

— Ҳаддан зиёд! Бепул клиникалар ҳақида гапирмаяпман — пулга ҳам бўш койка топиш қийин. Томография қилиш учун навбатда бир соат кутишимга тўғри келди.

— Даҳшат.

— Якунда дўстларим COVID-19’га ихтисослашган хусусий клиникага жойлаштиришди. Бу ерда жуда малакали шифокорлар бор. Улар мени тўлиқ текширди, кўплаб тестлар топширдим. Компьютер томографиясида ўпканинг 20 фоизи зарарланганлиги аниқланди. Шифокор вақтида келганимни акс ҳолда жиддий муаммолар пайдо бўлиши мумкинлигини айтди.

— Қачон касал бўлдингиз?

— 28 август. Биринчи кунларни меҳмонхона хонасида ўтказдим. Ўзимни яхши ҳис қилдим, йўтал ҳам, иситма ҳам йўқ эди. Кейин эса бирдан 39 га чиқди. Шундан сўнг ҳамма касалхонага эҳтиёж борлигини тушунди.

— Ҳид сезиш йўқолдими?

— Йўқ. Аммо ҳеч нарса қилишни хоҳламадим. На ейишни на ичишни ва на гапиришни. Фақат шифтга қараб ётдим. Иштаҳа йўқолди. Бир неча кун ичида беш килограмм вазн йўқотдим.

— Хўш, хўш.

— Аммо касалхонада тезда соғайиб кетдим. Ҳозир қандайдир қувноқлик пайдо бўлди ва иштаҳа қайтди. Тана ҳароратим ҳам жойида, қон босими ҳам. Мен айниқса, асоратлар олди олинганидан хурсандман. Шу тариқа тузалмоқдаман.

— Касалхонада яна қанча ётасиз?

— Уч кун (суҳбат 5 сентябрь куни бўлиб ўтган) — аниқ. Кейин яна тест топшираман. Агар динамика ижобий бўлса ва шифокорлар рухсат берса, мен дарҳол Наманганга кетаман.

— Ташхисни қачон эшитдингиз, қўрқув бўлмадими?

— Ростини айтсам, йўқ. Менимча, бундай вазиятда энг муҳими, ваҳимага ва умидсизликка тушмаслик керак. Аксинча, одам яхшиликка умид қилиши ва шифокорларнинг барча кўрсатмаларига амал қилиши лозим. Ишончим комилки, уларнинг ёрдами билан вирус мағлуб бўлади ва яқин орада мен ўзимнинг севимли ишимга қайтаман.

Тошкент

— Эшитишимча, «Навбаҳор»да кўпчилик касалланган.

— Ҳа, етти нафар футболчи, массажчи ва видеотасвирчи. Асосийси, биз Наманганда яшаганимизда ҳаммаси жойида эди. Улар базада изоляция қилинган, контактлар минималлаштирилганди. Шу билан бирга учрашувларни хотиржам ўтказаётгандек. Тўсатдан август ойида федерация навбатдаги тўртта тур айнан бир шаҳарда ўтказилишини эълон қилди.

— Қайси шаҳар?

— Тошкентда. Мен бунга қатъиян қаршилик билдирдим, айниқса, у ерда коронавирус тарқалиши авж олганди. Афсуски, бошқа клублардаги ҳамкасбларим буни қўллаб-қувватламади. Бу ерда ҳамма лига раҳбарияти билан баҳслашишдан, ўз фикрларини очиқ айтишдан қўрқади. Истиснолар бор: «Пахтакор» устози Шота Арвеладзе ва мен.

— Натижада барча жамоалар Тошкентга келдими?

— Ҳа. Биринчи учрашувни ўтказдик, битта футболчимиз касал бўлиб қолди. Ва кейин — занжирни узишнинг имкони бўлмади. Еттита ўйинчимиз касал бўлди. Шундан сўнг ўйинларни қолдиришни сўрадик, аммо лига бунга рад жавобини берди. Худо ҳаммасини кўриб турибди.

— Вазиятдан қандай чиқдингиз? «Ростов» каби мактаб ўқувчиларини туширдингизми?

— Бу даражагача етиб бормади. Илгари кам ўйин амалиётига эга бўлган ёш йигитларга имконият бердик. Ва улар ўзларини яхши томондан кўрсатди. Масалан, биз чемпионат етакчиси «Пахтакор» билан 1:1 ўйнадик. «Сочи» «Ростов» учрашуви эса шунчаки шармандалик! «Сочи» раҳбарлари, юмшоқ қилиб айтганда жудаям хунук иш қилди.

— Ҳали ҳам Ўзбекистон чемпионати ўйинлари мухлисларсиз ўтказилмоқдами?

— Ҳа. Бу қанча давом этиши ҳам номаълум.

— «Навбаҳор»нинг россиялик легионерларининг барчаси соғми?

— Улардан коронавирусга чалинган фақат Иван Соловёв. У иккита учрашувни ўтказиб юборди, учинчисида эса, тахминан, 15 дақиқа югурди ва уни майдондан фақат олиб чиқиб кетиш мумкин эди. Аммо Ваня кучли футболчи, характерли, у охиригача курашди. У «Навбаҳор»нинг етакчи футболчиларидан бири ва клуб у билан шартномани узайтирмоқчи. Россиядан келган бошқа йигитлар — Паша Голишев, Руслан Болов ва Игорь Голбандан кўнглим тўқ. Дарвоқе, Голбан баҳорда Ўзбекистон фуқаролигини олди.

Остон Ўрунов

— Остон Ўруновнинг «Спартак» истиқболларини қандай баҳолайсиз?

— У менда, «Навбаҳор»да бўлган. Жуда қобилиятли бола. Баланд бўйли, кучли, техникаси ва тезлиги ҳам яхши. Ўйинни ўзига олишдан қўрқмайди. Агар тактик жиҳатдан ишланса, у «Спартак»ка катта ёрдам беради.

— Қайси позицияда?

— Бизда Ўрунов ҳужумкор ярим ҳимоячи эди. У тўпни олиб қўяр, рақиб дарвозаси томон кетаётганида эса бемалол икки ёки учтасини алдаб ўтарди ёки шерикларига ажойиб пас берарди. Ёшлар жамоасида эса Ўрунов ярим ҳимоя марказида ишлатилган. У ерда унга ҳамма нарсага рухсат берилганди, эркалатиб юборишган. Шундай қилиб у алдашга киришиб кетарди ва тўпни йўқотарди. Мен Остонга катталар футболида талаблар бошқачароқ эканлигини тушунтирдим. Мисол тариқасида Рой Кин, Пол Инс, Стефан Шварц, Женнаро Гаттузони келтирдим. Бу йигитлар бир-биридан фарқ қилмасди.

— Уларни нима боғлайди?

—Майдон ўрталарида уларнинг барчаси эҳтиёткорлик билан, аммо фантастик даражада ишончли ҳаракат қилади. Ва, албатта, кутилмаганда тўпни йўқотиб қўявермайди. Ўруновнинг бунга мослашиши қийин бўлди, шунинг учун уни ҳужумга яқинлаштирдим. У ўзини инсайдер сифатида намоён қилди ва ҳар бир учрашувда камида иккитадан имкониятга эга бўларди.

— Остон кибрлими?

— Бу нима деганингиз! Аксинча, у камтар, хотиржам йигит. Инсоний фазилатларга келсак, ҳеч қандай саволга ўрин йўқ. Интизомли. Бу борада Ўзбекистон футболчилари орасида муаммолар йўқ.

— Ўрунов «Спартак» билан шартнома имзолаганидан кейин биринчи қилган иши Instagram’га қимматбаҳо харидлари фотосуратини жойлаш бўлди.

— Нима учун бу расмга ёпишиб олинганини тушунмаяпман. Нима бошқа футболчилар дўконга бормайдими? Бренд буюмларни сотиб олмайдими? Ҳа, пакетлар сони бўйича Остон ошириб юборган бўлиши мумкин. Кўзлари ёниб кетган, ҳамма нарсани сотиб олгиси келган. Ёшликда бўлиб туради.

— «Локомотив» ёзда сотиб олган Жасур Жалолиддиновга қараганда Ўруновга кўпроқ ишонасиз, шундайми?

— Албатта. Жалолиддинов ҳам техникали, тўп билан муомала қилишни яхши кўради, дриблинги жойида. Аммо РПЛ учун фикримча, у ҳали ёшлик қилади. Унга «Локомотив»даги рақобатда ғолиб чиқиш жуда қийин бўлади. Остон жисмонан кучлироқ, бўйи 20 сантиметрга баланд, умуман олганда футболчи сифатида шаклланиб бўлган. 18 ёшли Жасур ҳақида бундай дейиш қийинроқ.

— Юрий Белоус (Жалолиддиновнинг агенти) Жасурни Жоау Мариудан кучлироқ деб ишонтирмоқда.

— Дадил айтилган гап. Бироқ бу менда табассумдан бошқа нарсани уйғотмади.

— Бугунги кунда Ўзбекистон чемпионатида Россиянинг топ-клубини кучайтира оладиган футболчи борми?

— Менга Жалолиддин Машарипов жуда ёқади. У жуда зўр инсайд, «Пахтакор» етакчиларидан бири. Яқинда уни Қатарга таклиф қилишди, аммо клуб уни қўйиб юбормади. Кучли бешталикнинг бошқа жамоаларида ҳам қизиқарли ўйинчилар бор. Уларнинг бирортаси Шомуродов ва Ўрунов даражасида Премьер Лигада ўйнаб кетса ажабланмайман.