«Пахтакор» бош мураббийи Шота Арвеладзе Coca-Cola Суперлига 15-тури доирасида «Бухоро»га қарши кечган ўйиндаги йирик ғалабадан кейин (4:0) ўз фикрлари билан ўртоқлашди.
Мураббий алмашганидан кейин «Бухоро»нинг ўйинида ўзгаришлар бўлди. Жамоа анча тартибли ўйнай бошлади. ОКМК билан ажойиб ўйнаб дуранг қайд этди, «Машъал»га қарши баҳсда кутилмаган битта гол ўтказиб юборди. «Бухоро» Ўзбекистон учун камдан-кам учрайдиган тактикада ўйнайди — 5-2-3. Бироз немисча услуб. Бундай тактикани ёриб ўтиш қийин бўлади. Биз йигитларга бунга қарши қандай ўйнаш кераклигини тушунтирдик. Биринчи бўлимда кўплаб вазиятлар яратдик, иккита гол урдик. Иккинчи таймда бироз темпни туширдик, аммо вазиятлардан фойдаланиб иккита гол урдик. Шу орада рақиб ҳам 2-3 марта қарши ҳужумга ўтди.«Пахтакор» 15-турдан кейин 38 очко билан пешқадам бўлиб турибди.Умуман олганда қийин баҳс бўлди. Баҳсдан олдин тартиб жуда ҳам муҳим эканлигини тушунтирдим. Танаффусдан кейин олтита ўйин ўтказдик ва энг қийин тақвим бизники эди. Йигитлар ҳар уч кунда ўйнамоқда. Улар робот эмас, аммо чиройли ўйин намойиш этмоқда.
Садриддин Абдуллаев, Жавоҳир Сидиқов ва Акром Комилов яхши формага кириб бормоқда. Баъзи футболчилар асосий таркибда тушмоқда, баъзилари захирадан тушмоқда. Рақобат бор, ротация бор. «Пахтакор» яхши ўйнаши, ғалаба қозониши, очко олиши ва олдинга интилиши учун барча ҳаракат қилмоқда.
Чемпионат марказлашган ҳолда давом этиши керакми? Биласизми, ҳозир ўз фикримни айтишни бошласам баъзида нотўғри тушунишади. Раҳбарият қандай қарор қилса, шундай. ЎФА ва ПФЛда мамлакатда нима бўлаётганини биздан яхши биладиганлар бор. Дастлабки рестартни у қадар яхши ўтказа олмадик. Барча клубларда вирус чиқди, буни олдини олиш мумкин эди. Биз камида икки ҳафта давомида Қатарда бўламиз. ПСЖ, «Челси» каби клубларда 3-4 футболчида вирус чиқаётганини ўқияпмиз. Мутахассислар билан маслаҳатлашган ҳолда Суперлигани қандай давом эттириш ҳақида қарор қабул қилингани яхши. Билишимча сўнгги тўртта тур худди биринчи даврадаги каби марказлашган ҳолда ўтказилади.
Ҳозирда Драган Чераннинг жойида ўйнайдиган футболчи олишнинг имкони йўқ. Аммо Сидиқов ҳужумчи ортида ўйнай олишини биласиз. Сидиқовнинг севимли жойи айнан ҳужумчи ортида ўйнаш эканлигини ҳам таъкидлашни истардим.
Шота Арвеладзе, «Пахтакор» бош мураббийи
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)