«Дарё»да «Бухорода тадбиркорга интенсив боғ яратиш учун салкам 12 гектар ер берилди. Бироқ пахтани суғориш лозимлиги айтилиб, сув берилмаяпти» сарлавҳали мақола эълон қилинганди. Мазкур мақолага муносабат билдирган Пешку туман ҳокимлигининг маълум қилишича, тадбиркорнинг муаммоси ҳал этилган.
Таъкидланишича, масъуллар 2020 йил 3 сентябрь куни туманнинг чекка ҳудуди — «Ўзбек» маҳалласида жойлашган «Алоқа сифат савдо» МЧЖга тегишли 11,6 гектар ер майдонига борган. Ҳолатга Пешку туман Халқ қабулхонаси масъул ходими Фарҳод Бобожонов, Бош вазир қабулхонаси туман бўлими ходими Ўктам Ражабов ҳамда туман Сув истеъмолчилари уюшмаси раиси Даврон Саидов томонидан аниқлик киритилган.
Пешку туман ҳокимлиги ахборот хизмати раҳбари Рустам Эргашевнинг билдиришича, тадбиркор Афзал Холиқов муаммоси ўша куни ҳал этилган.
«‘Дарё’да пешкулик тадбиркор мурожаати юзасидан эълон қилинган мақоладан сўнг, аниқроғи, 2020 йилнинг 31 август кунидан бошлаб тадбиркорнинг интенсив боғ яратиш учун ажратилган ер майдонига сув берила бошланган. Бугунги кунга келиб мазкур ер майдонининг бир қисми суғорилган ва суғориш ишлари туман сув хўжалиги ташкилоти томонидан назоратга олинган», — дейди Рустам Эргашев.
Изоҳ (0)