Тошкент вилояти ҳудудида 2020 йилнинг ўтган даври мобайнида 390 та йўл-транспорт ҳодисаси содир этилди. Уларнинг сонини камайтириш, йўл ҳаракати қоидаларини кенг кўламда тарғиб қилиш мақсадида вилоят ҳудудида тарғибот автокарвони ташкил этилди. Бу ҳақда Тошкент вилояти ИИББ ЙҲХБ ахборот хизмати «Дарё»га маълум қилди.
Тарғибот автокарвонига йўл ҳаракати хавфсизлиги ходимлари, «Ватанпарвар» ўқув ташкилотининг мутахассислари бириктирилди. Улар олдига ҳаракат иштирокчиларига тадбирни ўтказишдан кўзланган асосий мақсад — йўл транспорт ҳодисаларининг олдини олишда амалга оширилиши лозим бўлган тадбирларни аниқ мисоллар ёрдамида тушунтириб бериш вазифаси қўйилди.
Тарғибот автокарвонига жалб этилган махсус эвакуатор автомобилларига қоидабузарликларнинг аянчли манзараси акс этган транспорт воситалари кўргазма сифатида юкланди.
Тарғибот автокарвони дастлаб патруль автомобиллари кузатувида Нурафшон ва Олмалиқ шаҳри кўчалари бўйлаб айланди, аҳоли гавжум жойларда тўхтади. Йиғилганларга тадбир мақсади тушунтирилди. Юк автомобилларига илинган баннерлар эса ҳайдовчи ва йўловчиларни янада ҳушёр, сергак ва интизомли бўлишга даъват этди.
Таъкидланишича, навбатдаги манзил Қибрай, Чирчиқ ва Бўстонлиқ туманлари бўлди. Тарғибот автокарвони шаҳар ва туман кўчаларини айланиб, кўпчилик эътиборини ўзига тортди.
Аввалроқ худди шундай автокарвон Наманган вилоятида ташкил қилинганди.
Изоҳ (0)