Австралия ҳукумати фуқароларининг коронавирус пандемияси туфайли бошқа хориж давлатларига чиқишига қўйилган тақиқни 17 декабргача узайтирди. Бу ҳақда 9News хабар берган.

Фото: EPA

Хориж давлатларининг фуқароларига, ҳукумат амалдорларига, денгизчилар ва учувчиларга истисно тариқасида мамлакат ҳудудидан ташқарига чиқишга рухсат берилади.

Шунингдек, Австралия портларига 17 декабргача бортида 100 нафардан зиёд йўловчиси бўлган катта саёҳат кемаларининг кириши ҳам тақиқланган. Кема 15 мартдан аввал ўз мамлакатини тарк этган бўлса ёки якунда Австралия портига қайтиши белгиланган ҳолатлар, фавқулодда вазиятларда мазкур чеклов истисно тариқасида вақтинча бекор бўлиши мумкин.

Қайд этилишича, иккала тақиқ ҳам 25 мартда жорий этилган ва мамлакатда ҳанузгача ўз кучида қолмоқда.

Австралияда 2020 йил 3 сентябрь ҳолатига кўра 26 мингдан зиёд кишида коронавирус инфекцияси борлиги аниқланган. 678 нафар бемор касаллик асоратлари оқибатида вафот этган.

Аввал Австралия пойтахти Канберрада АҚШнинг Novavax компанияси ишлаб чиққан коронавирусга қарши вакцинанинг клиник синовлари бошлангани ҳақида хабар қилинганди.