Тожикистон Социал-демократик партияси октябрь ойида бўлиб ўтадиган президентлик сайловига бойкот эълон қилди. Бундай қарор 31 август куни партия сиёсий кенгаши мажлисида қабул қилинган. Бу ҳақда Asia Plus хабар берди.
Партия етакчиси Раҳматилло Зойировнинг маълум қилишича, у партиянинг барча аъзоларини партия интизомига риоя қилишга ва овоз бериш учун сайлов участкаларига бормасликка, президентлик сайловига умуман эътибор бермасликка чақирмоқда.
Зойировнинг фикрича, Марказий сайлов комиссияси томонидан кўрсатилган муддатда 250 мингта имзо тўплашнинг иложи йўқ.
Унинг сўзларига кўра, бойкотнинг яна бир сабаби мамлакат президенти партия раиси эканлигини ҳисобланади.
«Унинг (Эмомали Раҳмон — таҳр) Тожикистон Халқ демократик партиясига раҳбарлик қилиши мамлакатда кўп партиявийлик тизимини деярли йўққа чиқарди ва республикани бир партиялига айлантирди», — деган Зойиров.
Бундан ташқари, Зойиров ва унинг партияси аъзолари бойкотнинг сабаби сифатида 2019 йилда қабул қилинган Марказий сайлов комиссияси ҳақидаги қонуннинг янги таҳририни кўрсатган.
«Бу қонунга кўра, сиёсий партиялар ва ҳаракатлар аъзолари марказий ва маҳаллий сайлов комиссияларининг ишида иштирок этиш ҳуқуқига эга эмас, уларнинг таркиби эса ижро этувчи органлар ва Тожикистонда ҳукмрон бўлган Халқ демократик партияси вакиллари ҳисобига шакллантирилади», — дея таъкидлаган партия етакчиси.
Тожикистонда президентлик сайлови 11 октябрь куни бўлиб ўтади. Ҳозирги пайтгача президентлик ўрни учун беш нафар номзод илгари қўйилган. Амалдаги президент Эмомали Раҳмоннинг номзоди Тожикистон Мустақил касаба уюшмалари федерацияси томонидан илгари сурилган.
Тожикистон Социал-демократик партияси етакчиси Раҳматилло Зойиров мамлакат президентлигига ўз номзодини қўймасликка қарор қилганини аввалроқ билдирган.
Изоҳ (0)