Буюк Британияда мактаб ўқувчилари учун янги тартиб-қоидалар ишлаб чиқилди. Уларга кўра ўқувчиларга атайин йўталиш ва коронавирус ҳақида ўзаро ҳазиллашиш тақиқланади, деб ёзмоқда Daily Mail.
Нашр бу борада бир нечта таълим муассасаларидаги ноодатий янгиликлар ҳақида маълумот берган. Масалан, Гастинг мактабида атайин ва ёмон мақсадда йўталиш ёки акса уриш, шунингдек, пандемия ҳақида ҳазиллар қилиш тақиқланган. Лондондаги муассасалардан бирида эса ҳазиллашиб йўталган ўқувчи мактабдан ҳайдалиши мумкин.
Бундан ташқари, ўқувчилар ҳожатхоналарга кириш юзасидан ҳам янги қоидаларга кўникиши лозим. Дербидаги мактабларнинг бирида ҳожатхоналарда ҳар бир синф учун алоҳида хонача ажратилган. Бегона «кабинка»га кирган ўқувчи жазо олиши мумкин.
Бутун дунёда COVID-19 коронавирус инфекцияси билан касалланганлар сони 25 миллиондан ошган. 846 мингдан зиёд бемор касаллик асоратлари оқибатида вафот этган. Буюк Британияда коронавирусга чалинганлар сони 334 минг нафарга яқин, COVID-19 туфайли қайд этилган ўлимлар сони эса 41 мингдан зиёдроқ.
Изоҳ (0)