Ўзбекистон бўйича август ойида бир порция палов қанчадан сотилгани маълум қилинди

Давлат статистика қўмитаси Ўзбекистон вилоятлари марказий ҳудудлари кесимида август ойи учун тайёр паловнинг ўртача нархларига оид маълумотлар билан бўлишди.

Қўмита томонидан тақдим этилган жадвалдан кўринишича, август ойида энг қиммат палов Бухорода сотилган. У ерда бир порция палов 18 667 сўм, бир килограмми эса 130 669 сўмдан сотилган. Энг арзон палов эса Сурхондарёда — бир порцияси 12 000 сўмдан, килограмми эса 84 000 сўмдан сотилган.

Тошкент шаҳрида 1 порция палов нархи 15 167 сўм (килограмми 106 169 сўмдан), Андижонда 15 167 сўм (106 169 сўм), Самарқанд ва Фарғонада 16 500 сўм (115 500 сўм), Хоразмда 14 600 сўм (102 200 сўм) бўлган.

Давлат статистика қўмитасининг алоҳида қайд этишича, нархларни рўйхатга олувчи томонидан кузатув ўтказилган кун ва вақтдаги нарх-наво қайд этилиб, бунда вақт ва жойига қараб нархлар ўзгариб туради.

Маълумотларнинг шаклланиши жараёнида фақатгина танлаб олинган умумий овқатланиш муассасалари (ош марказлари)даги паловнинг ўртача нархлари ҳисобга олинган бўлиб, ресторан ва чойхоналардаги нархлар инобатга олинмаган.