Самарқанд вилоятининг Катта қўрғон шаҳрида А. исмли фуқарони Миллий гвардия ҳарбий техника институтига ўқишга киритиб қўймоқчи бўлган фирибгарга нисбатан жинояти иши қўзғатилди. Бу ҳақда Бош прокуратура ахборот хизмат «Дарё»га маълум қилган.
Бош прокуратура ҳузуридаги департаментнинг Каттақўрғон шаҳар бўлими томонидан ўтказилган терговга қадар текширувда Б.Н.нинг фирибгарлик йўли билан даромад орттиришни кўзлаб А.ни алдагани фош бўлди. У йигитни Миллий гвардия ҳарбий техника институтига юқори лавозимда ишловчи танишлари орқали ўқишга киритиб қўйиш эвазига 8 000 АҚШ доллари талаб қилган ва шундан 1 500 АҚШ долларини олиб, ўз эҳтиёжларига ишлатиб юборгани аниқланган.
Мазкур ҳолат юзасидан Б.Н.га нисбатан Жиноят кодексининг 168-моддаси 1-қисми (фирибгарлик) ва 211-моддаси (пора бериш) билан жиноят иши қўзғатилган ва тергов ҳаракатлари олиб борилмоқда.
2020 йил март ойида ўзини «Миллий гвардия майори» деб таништириб, ишга киритиб қўйиш учун ва шу каби бошқа масалаларда фуқаролардан пул ундираётган аёл қўлга олингани ҳақида хабар берилган. 18 август куни эса Самарқанд вилоятида Миллий гвардияга ишга киритиб қўйишни ваъда қилиб, ўзганинг 27 минг 200 доллар миқдоридаги пулларни қўлга киритган фуқаро фирибгарликда айбланаётгани ва дастлабки тергов ҳаракатлари бошлангани маълум қилинган.
Изоҳ (0)