Фавқулодда вазиятлар вазирлиги 2020 йилнинг 18 август куни соат 11:43 ларда «Қамчиқ» довонида жойлашган «Қўшминор» МФЙнинг аҳоли яшаш жойидан узоқда тоғли ҳудудининг юқори қисмига дам олиш учун чиққан фуқаро қияликдан йиқилиб тушгани ҳақида хабар қилди.
Маълум бўлишича, икки нафар фуқаро тоғли ҳудудга дам олишга чиққан. Бироқ улардан бири эҳтиётсизлик оқибатида қияликдан тушиб кетган.
Улар воқеадан кейин дастлаб тез тиббий ёрдамга қўнғироқ қилган. Тиббиёт ходимлари воқеа жойига етиб келиб, жароҳатланган одамнинг анча баландликда эканини айтган. Фуқарони қуйига тушириб олишда қўшимча ёрдам кераклиги боис ҳолат юзасидан «Қамчиқ» қутқарув отряди ходимларига хабар берилган.
ФВВ хабарига кўра, бошқарманинг қутқарув гуруҳидан оддий аскар Ж. Куранбаев ҳодиса жойига келган ва тез тиббий ёрдам ходимлари билан бирга жабрланувчини пастга олиб тушган.
Фуқарога биринчи тиббий ёрдам кўрсатилган ва у Поп тумани марказий шифохонасига юборилган.
Аввал 2020 йил 18 июль куни Isuzu ҳайдовчисининг ухлаб қолиши оқибатида, юк машинаси олдинда ҳаракатланиб кетаётган Sams’га бориб урилгани, Isuzu ҳайдовчиси ва унинг ёнидаги шериги тан жароҳати олгани, ФВВ қутқарувчилари гидравлик асбоб-анжомлар ёрдамида сиқилиб қолган ҳайдовчи ва унинг шеригини машинадан чиқариб олиб, уларга тиббий ёрдам кўрсатгани ҳақида хабар берилганди.
Изоҳ (0)