Farg‘onada firibgar erkak Toshkentdagi bemorlarning xayriya pullarini o‘zlashtirib olgani aniqlandi

Farg‘onaning Qo‘qon shahrida yashovchi shaxs toshkentlik bemorlarning xayriya pullarini o‘zlashtirib olgani aniqlandi, deya xabar bermoqda “Postda.uz”.

Ma’lum bo‘lishicha, muqaddam sudlangan M.S. plastik karta bilan qanday ishlash xususida turli elektron dasturlarni o‘rganadi. So‘ng og‘ir xastalikka chalingan, davolanish maqsadida saxovatli insonlar ko‘magiga umid qilib bankda hisob raqami ochtirgan bir necha fuqaroning ro‘yxatini tuzib, ular bilan telefon orqali suhbatlashadi.

Dastlab Respublika ixtisoslashtirilgan onkologiya va radiologiya ilmiy-amaliy tibbiyot markazining Toshkent shahar filialida davolanayotgan ayolga telefon qilib, yordam bermoqchiligini aytib, plastik karta raqamini so‘ragan. Aldov yo‘li bilan uning ishonchiga kirgan M.S. birozdan keyin yana qo‘ng‘iroq qilib, pul o‘tkazishida qandaydir muammo bo‘layotganini, ayolning telefoniga 4 ta raqamdan iborat SMS yuborishi, uni qaytib o‘ziga aytib yuborishni so‘ragan.

Ayol telefoniga kelgan sms kodni aytgan. M.S esa o‘zining uyali telefoni yordamida bemor ayolning plastik kartasiga ulanib, hisobida 1 million 400 ming so‘mdan ortiq pul borligini aniqlaydi va uni 153 dollarga aylantib, o‘zining elektron hamyoniga o‘tkazib olgan.

Shundan so‘ng ro‘yxatdagi boshqa raqam egalari bilan ham bog‘lanib, Toshkent shahar Olmazor tumanida joylashgan xususiy shifoxonada davolanayotgan erkakning xayriyadan yig‘ilgan jami 19 million 829 ming so‘m pulini 2 163 dollarga aylantirib, o‘zining elektron hamyoniga o‘tkazgan. Bosh miya o‘simtasi bilan davolanayotgan jiyaniga yordam tariqasida kelayotgan xayriya pullarini yig‘ayotgan erkakning ham plastik kartasi hisobidagi jami 9 817 200 so‘mni shu yo‘l bilan o‘zlashtirgan.

Jabrlanuvchilar zudlik bilan ichki ishlar organlariga murojaat qilgan. Mazkur jinoyat ishi bo‘yicha tergovga qadar surishtiruv ishlarini olib borgan Toshkent shahar IIBB JQB tezkor vakili, kapitan Bekzod Tillaxo‘jayev darhol Qo‘qon shahriga borgan. U yerda M.S.ni to‘satdan uchratib qolgan va xasta kishilarning salomatligi uchun yiqqan pullarni o‘sha odamga buyurmasligini aytib o‘tgan.

Ertasi kuni esa gumonlanuvchining o‘zi uchta holat bo‘yicha jabrlanuvchilarning plastik kartasidagi pullarni o‘z hisobiga o‘zlashtirib olganligini aytib, qilmishidan pushaymon ekanini aytib, kechirim so‘ragan. Tergov jarayonida bemorlardan olgan barcha pullarni egalariga qaytarib bergan.

Sud M.S.ga jazo tayinlashda uning aybiga iqrorligini, qilmishidan pushaymonligini, oilaviy ahvolini, jabrlanuvchilarga yetkazilgan zarar to‘liq qoplanganligini jazoni yengillashtiruvchi holatlar sifatida baholab, unga bir yilu olti oy muddatga ozodlikdan mahrum qilish jazosi tayinlagan.