Расман: «Барселона» янги бош мураббий номини эълон қилди

Каталониянинг «Барселона» клуби нидерландиялик Рональд Куман жамоага бош мураббий этиб тайинлангани ҳақида хабар берди.

57 ёшли мутахассис каталонияликлар билан 2022 йил ёзига қадар мўлжалланган битимга имзо чеккан.

Куман 2018 йилдан бери ҳозирга қадар Нидерландия терма жамоасини бошқариб келаётган эди. У миллий жамоа билан Миллатлар Лигаси—2019 мусобақасида финалга қадар етиб борди. Финалда эса Португалия термасига 0:1 ҳисобида енгилди.

Ўйинчи сифатида Рональд Куман 1989—1995 йилларда «Барселона» шарафини ҳимоя қилган. У клуб билан 4 марта Испания чемпионатида ғолиб чиққан, 3 марта мамлакат Суперкубогини ва 1 мартадан Испания Кубоги, Европа Чемпионлар Кубогида бош совринга эга чиққан. Шунингдек, 1 марта УЕФА Суперкубогини қўлга киритган.

Ривалдодан Суаресгача. «Барселона» футболчилари томонидан урилган акробатик усулдаги топ-5 гол

2000 йил «Витесс» клубида иш бошлагунга қадар Куман «Барселона»да ёрдамчи мураббий сифатида фаолият олиб борган.

Рональд «Аякс», «Бенфика», ПСВ, «Валенсия», АЗ, «Фейеноорд», «Саутҳэмптон», «Эвертон» клубларида бош мураббий сифатида ишлаган. Мураббийлик фаолиятида уч марта Нидерландия чемпиони бўлган. Шунингдек, ушбу мамлакат Кубоги ва Суперкубогида ғолиб чиққан. Бундан ташқари Португалия Суперкубоги ва Испания Суперкубогини қўлга киритган.

Рональд Куманнинг “Барселона” сафидаги қойилмақом 10 та голи