Нукусдаги коронавирусни ташхислаш ва даволаш марказига ҳарбий шифокорлар ҳам жалб этилди

17 август куни COVID-19 инфекциясига гумон қилинаётган беморларни даволаш мақсадида Олимпия ва миллий спорт турлари бўйича Нукус олий спорт маҳорати мактаби базасида ташкил этилган вақтинчалик ташхислаш-тақсимлаш ва даволаш маркази ўз ишини бошлади. Бу ҳақда Мудофаа вазирлиги ахборот ва оммавий коммуникациялар департаменти «Дарё»га маълум қилди.

Марказ фаолиятини ташкил этишда Мудофаа вазирлигининг Шимоли-ғарбий ҳарбий округ қўшинлари қўмондонлиги ҳам ўз ҳиссасини қўшган. Яъни ташкил этилган марказда 4 нафар ҳарбий шифокор ва 4 нафар ҳарбий тиббиёт муассасаларининг кичик тиббий персонали фуқаролар саломатлигини сақлаш, пандемия билан курашишда малака алмашиш мақсадида хизматда бўлади.

Марказнинг очилиш маросимида Қорақалпоғистон Республикаси Вазирлар Кенгаши раҳбарияти, Шимоли-ғарбий ҳарбий округ қўшинлари қўмондонлиги, тиббиёт мутахассислари ҳамда ҳарбий хизматчилар иштирок этган.

«Бугунги кунда аҳолига узлуксиз тиббий хизмат кўрсатиш ҳамда Коронавирус юқумли касаллиги билан касалланганларни даволаш сифатини яхшилаш мақсадида Қорақалпоғистонда 167 та тез ёрдам машиналари ҳамда халқ орасида COVID-19 касаллик белгилари бўлган фуқароларни шифо масканларига етказиш учун Нукус шаҳрида 42 дона ва ҳар бир туманда ўртача ҳисобда 6-7 донадан жами республика бўйича 183 та мобил бригадалар ишлаб келмоқда», — дейди тадбирда сўзга чиққан Қорақалпоғистон Республикаси Вазирлар Кенгаши раисининг ўринбосари Муратбай Жуманов.

Маълумотларга кўра, айни вақтда Қорақалпоғистон Республикасида тез тиббий ёрдам машиналарига бўлган эҳтиёж тўлиқ таъминланган ҳамда бу йўналишда 838 нафар шифокор ва 1091 нафар фелдшер фаолият олиб бормоқда.

Ташкил этилган вақтинчалик марказдаги 7 та блокда жами 390 ўрин мавжуд бўлиб, биринчи қаватида 224 ўринли ётоқ жойлар касаллик туфайли нафас олиши қийналган беморлар ва иккинчи қаватдаги 166 та жой касаллик аломатлари енгил кечадиган беморлар учун белгиланган.

Касаллик аломатлари бор беморларни қабул қилиш жойида ултратовуш текширув аппарати (УЗИ), рентген аппарати, ЭКГ ва лаборатория хизмат кўрсатади. Беморларни ташхислаш ва даволаш учун барча зарур тиббиёт воситалари ва нафас олишни енгиллаштирувчи аппаратлар ўрнатилган. Юришга қийналган ва аҳволи оғир беморлар учун ногиронлик аравачалари ва тиббиёт замбиллари мавжуд. Марказ фаолияти узлуксизлигини таъминлаш мақсадида 14 кунлик навбатчи сменада 12 соатдан иш вақти этиб белгиланган. Унда жами 150 нафар малакали тиббиёт ходимлари фаолият кўрастади. Шунингдек, ушбу тиббиёт муассасасининг иш-фаолиятини тўғри йўлга қўйиш ҳамда беморларни даволашда тасдиқланган усулларни қўллашни ўргатиш мақсадида Соғлиқни сақлаш вазирлиги Эпидемиология, микробиология ва юқумли касалликлар илмий текшириш институтининг юқори тоифали мутахассислари ушбу жараёнларга жалб қилинган.

Тиббиёт муассасаси, ходимлар ва беморларнинг хавфсизлигини таъминлаш, пандемия тарқалишига йўл қўймаслик ҳамда ҳудуд қўриқловини ташкил этиш мақсадида Шимоли-ғарбий ҳарбий округ томонидан вақтинчалик оператив штаб ташкил этилган бўлиб, унда кечаю кундуз навбатчилик йўлга қўйилган. Қолаверса, шифокорларнинг Тошкентдаги марказ билан маслаҳат ва тажриба алмашиш, беморларни даволашда консилиумлар ўтказиш мақсадида ҳарбий округ томонидан 24 соатлик онлайн видеоконференцалоқа тизими жорий этилган. Оператив штаб ичкарида ўрнатилган 8 дона видеокузатув камералари орқали марказ ички фаолиятни ташқаридан туриб доимий назорат ва ҳамкорлик қилиш имконига эга.

Таъкидлаш жоизки, Тошкент тажрибасидан келиб чиқиб, Нукус шаҳридаги 3 та спорт объектларида 1000 ўринли, Қорақалпоғистоннинг ҳар бир туманида 200—500 ўринли тақсимлаш марказлари фаолияти йўлга қўйилиб, улар бугунги кунда жами 5200 ўринни ташкил этади.

Тошкентда Учтепа туманида жойлашган Аtlas мебель марказида коронавирусга қарши кураш доирасида навбатдаги тақсимлаш маркази ташкил этилган.

Юнусобод туманидаги «Ўзэкспомарказ»нинг 3-павильонида 1000 ўринлик махсус марказ фаолият юритмоқда (масъул – Тошкент шаҳар ҳокимлиги). Шунингдек, 1 ва 2-павильонларда яна 814 та койка тайёрланган (масъул – Мудофаа вазирлиги госпитали).

Бундан ташқари, Юнусободдаги гимнастика саройида 750 ўринли (масъул – ИИВ госпитали), Шайхонтоҳур туманидаги «Ёшлик» спорт мажмуасида 520 ўринли (масъул – ДХХ госпитали) биринчи тиббий ёрдам марказлари фойдаланишга топширилган. Сергели туманидаги 2-сон БЎСМ 250 ўринли даволаш маскани этиб қайта жиҳозланган.

Ўзбекистон давлат жаҳон тиллари университети ётоқхонаси ва Чилонзор туманидаги Cardio Star Plus хусусий клиникаси (50 та ўрин) ҳам коронавирусга гумон қилинганларни вақтинча сақлаш масканларига айлантирилган.