Ўзбекистонда ер участкаларининг ҳокимлар томонидан олиб қўйилишига тақиқ белгиланади

Олий Мажлис Қонунчилик палатасидаги ЎзЛиДеП фракцияси 2020 йил 17 август куни видеоконференцалоқа тарзидаги навбатдаги йиғилишини ўтказди, дея хабар бермоқда парламент ахборот хизмати.

Йиғилишда «Мулкдорлар ҳуқуқлари ва қонуний манфаатларининг кафолатлари янада кучайтирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонун лойиҳаси муҳокама қилинди.

Маълум қилинишича, мазкур қонун лойиҳаси Олий суд томонидан Президентнинг 2019 йил 13 декабрдаги тегишли қарори билан тасдиқланган Конституция ва қонун устуворлигини таъминлаш, бу борада жамоатчилик назоратини кучайтириш ҳамда жамиятда ҳуқуқий маданиятни юксалтириш бўйича чора-тадбирлар дастури 6-бандининг ижросини таъминлаш мақсадида ишлаб чиқилган.

Шу билан бирга, таклиф этилаётган қонун лойиҳаси мулкдорлар ҳуқуқлари ва қонуний манфаатларининг кафолатларини янада мустаҳкамлашга қаратилган.

Қонун лойиҳасига ер участкаларининг ҳокимлар томонидан олиб қўйилишига тақиқ белгилаш, ер участкасига эгалик қилиш ва ундан фойдаланиш, ер участкасини ижарага олиш ҳуқуқини тугатиш бўйича уларнинг ваколатларини чеклаш, ер участкаларини давлат ва жамоат эҳтиёжлари учун, шунингдек, инвестиция лойиҳаларини амалга ошириш учун олиб қўйиш ваколатини Қорақалпоғистон Жўқорғи Кенгесига, халқ депутатлари вилоятлар ва Тошкент шаҳар Кенгашларига бериш ва шу кабиларни назарда тутувчи ўзгартириш киритиш таклиф этилмоқда.

Фракция аъзолари қонунларнинг юқори сифати ва барқарорлигига эришиш, уларни ҳаётга татбиқ этишнинг ишончли механизмини яратиш партия депутатлик корпусининг дастурий вазифаси эканини қайд этиб, таклиф этилаётган қонун лойиҳасини қўллаб-қувватлагани маълум қилинган.