Давлат мактаб ҳамда мактабгача таълим муассасалари фаолиятини бошлаши юзасидан санитария-меъёр қоидалари ишлаб чиқилмоқда. Бу ҳақда АОКА залида ташкил этилган брифингда Коронавирусга қарши курашиш штаби аъзоси Рустам Икромов маълум қилди.
«Санитария-эпидемиологик осойишталик агентлиги, Мактабгача таълим вазирлиги ва Халқ таълими вазирлиги билан биргаликда санитария-меъёр қоидалари ишлаб чиқилмоқда. Бу меъёрлар шу кунларда Адлия вазирлигида ҳуқуқий экспертизадан ўтказиляпти. Экспертизадан ўтказилгач, бажарилиши умуммажбурий ҳисобланган меъёрлар белгилаб берилган, уларга амал қилган ҳолда ушбу муассасалар фаолиятига рухсат берамиз», — дейди мутахассис.
Икромов мактаб ва мактабгача таълим муассасалари фаолиятини бошлаш ушбу ташкилотларнинг фаолиятини тезроқ йўлга қўйиш ёки ҳисобот учун эмас, балки болаларни ижтимоий ҳаётга тезроқ қайтариш, уларнинг карантин шароитидаги руҳиятидаги ўзгаришларни бартараф этиш билан боғлиқлигини қайд этди.
Эслатиб ўтамиз, аввалроқ ижтимоий тармоқларда «1—4 ва 11-синфлар 2 сентябрдан, 3—7 ва 9-синфлар 20 октябрдан, 5—8 ва 10-синфлар 5 ноябрдан мактабга бориши» ҳақида айтилган бўлса, яна бирида «10 сентябргача мактаблар очилишига кўрсатма берилгани» ҳақида хабар тарқалган, Халқ таълими вазирлиги ахборот хизмати раҳбари Лайло Рустамова уни рад этган, вазирлик 2020/2021-ўқув йили учун 3 та сценарий устида ишлаётганини маълум қилган эди.
Изоҳ (0)