Ўзбекистонда хориждаги салоҳиятли ватандошларни рўйхати жамланган «олтин дафтар» жорий қилинади. Бу ҳақда ташқи ишлар вазирининг биринчи ўринбосари Фарҳод Арзиев 17 август куни Президент ҳузурида меҳнат миграцияси масалаларига бағишлаб ўтказилган йиғилишдан сўнг «Ўзбекистон 24»га берган интервьюсида маълум қилди, дея хабар қилди «Kun.uz».
«Президент томонидан белгилаб берилган яна бир йўналиш – салоҳиятли ватандошларнинг имкониятларидан фойдаланиш.
‘Олтин дафтар’ деган термин, яъни Ўзбекистоннинг тараққиётига у ёки бу маънода хизмат қила оладиган салоҳиятли инвестор бўладими, хориждаги нуфузли университетларда ишлаётган профессор бўладими ёки халқаро ташкилотлар ишлаётган ватандошлар бўладими, уларни мамлакат тараққиётига ҳисса қўшишга жалб қилиш.
Бу борада ҳам ишларни тизимли тарзда йўлга қўйиб, зарур чора-тадбирларни амалга ошириш, илғор хорижий тажрибани ўрганиб, Ўзбекистон шароитида қўллаш бўйича аниқ топшириқлар берилди», – деди вазирнинг биринчи ўринбосари.
Фарҳод Арзиев ушбу реестрнинг аҳамияти ҳақида Халқаро пресс-клубнинг июнь ойидаги сессияларидан бирида ҳам тўхталиб ўтган.
«Дунё тажрибасига қарайдиган бўлсак, Туркияда ҳам, Хитойда ҳам, Ҳиндистонда, Европа давлатлари, масалан, Италия ва Ирландияда ҳам шундай тажриба бўлган – ўз вақтида хорижда шаклланган диаспораларнинг салоҳияти мамлакат тараққиётига жалб қилинган.
Хитой мисолида олсак, уларнинг диаспорасини хуацяо дейишади – 90 йилларда хориждан Хитойга кириб келган инвестицияларнинг салкам 90 фоизи бевосита хорижда яшаётган хитойликлар билан боғлиқ бўлган. Бугунги кунда бу кўрсаткич тахминан 60 фоизни ташкил қилади. Долларга чақадиган бўлсангиз, сўнгги йилларда Хитойга кириб келаётган тахминан 350 миллиард долларлик инвестиция бевосита хорижда яшаётган хитойликлар томонидан киритилган.
Бу йўналишга биз тараққиётимиз учун ўсиш нуқталаридан бири сифатида қараяпмиз», – деганди у.
ТИВ расмийси асли ўзбекистонлик бўлган чет эл фуқароларига виза масаласида енгиллик берилиши мумкинлигини ҳам қўшимча қилган.
Аввалроқ Ўзбекистонда хорижий меҳнат миграциясини қўллаб-қувватлаш учун янги тизим яратилиши ҳақида хабар берилганди. Шунингдек, Ўзбекистонда ҳар йили 200 минг киши меҳнат мигрантига айланаётгани маълум қилинган.
Изоҳ (0)