Қашқадарё вилоятида тез тиббий ёрдам ҳайдовчилари ва ҳамширалар Вазирлар Маҳкамаси қарорига кўра берилган рағбат пулини олишда ноҳақликларга йўл қўйилганини айтиб, вилоят ҳокимлиги биноси олдида тўпланди. Бу ҳақда хабар берган «Дарё» мухбирининг ёзишича, тиббиёт ходимларининг мазкур масала юзасидан норозилиги биринчи маротаба эмас.
«32 йилдан бери тез тиббий ёрдамда фельдшер бўлиб хизмат қиламан. Лекин рағбат пули беришмади», — дейди ҳокимлик биноси олдида тўпланган фуқаролардан бири Хушвақт Мардонов.
Қарши шаҳар тез тиббий ёрдам бўлими ҳайдовчилари Исроил Темиров, Ғайрат Бобоназаров ва Абдураҳмон Мансуровларнинг маълумот беришича, ҳайдовчилар учун ваъда қилинган уч миллион сўм тўлиқ берилмаган.
«Кечагина ишга келган ҳамкасбларимиз 3 миллион сўмни тўлиқ олишди. Биз бир неча йилдан бери шу соҳада ишласак-да, пулни тўлиқ беришмади. Атиги 1,5 миллион сўм олдим», — дейди Исроил Темиров.
«Менга 2 миллион 100 минг сўм тўлаб беришди. Нега тўлиқ берилмаяпти десам, ‘штатлар жадвалига асосан тўлаб беряпмиз’ дейишди. Ҳолбуки, бизда шу пайтга қадар штат деган нарса йўқ эди», — дейди Ғайрат Бобоназаров.
Тез тиббий ёрдамнинг яна бир ҳайдовчиси Абдураҳмон Мансуровнинг айтишича, унга 2 миллион 700 минг сўм тўлаб берилган. Қолган пул эса берилмаган.
Шикоятчилар билан мулоқот қилган вилоят ҳокими ўринбосари Рустам Йўлдошевнинг вазиятни изоҳлашича, кўплаб тиббиёт ходимлари Вазирлар Маҳкамасининг 2020 йил 30 июлдаги 458-сонли қарори билан танишиб чиқмаган, шу сабаб норозилик юзага келмоқда.
«Вазирлар Маҳкамасининг қарорида коронавирус инфекцияси тарқалишига қарши курашга жалб этилган тез тиббий ёрдам ходимлари — врачлар, ўрта тиббиёт ходимлари, яъни фельдшер ва санитарлар ҳамда ҳайдовчилар рағбатлантирилиши белгилаб берилган. Бизга мурожаат қилиб келаётганларнинг аксарияти эса диспетчер лавозимида ишлаб келаётганлар бўлиб, улар рағбатлантирилувчилар рўйхатида йўқ. Улар эса биз ҳам тиббиёт ходимимиз-ку, нега бизга берилмайди дея савол беришдан чарчашмаяпти», — дейди вилоят ҳокими ўринбосари Рустам Йўлдошев.
Ҳокимлик биноси олдида тўпланган мурожаатчилардан Ойдин Йўлдошева ҳам тез тиббий ёрдам бўлимида 31 нафар ҳамкасблари орасида ажралиб қолганини, рағбат пули берилмаганлигини айтиб, шикоят қилди.
Рустам Йўлдошевнинг аниқлик киритишича, Ойдин Йўлдошева йиллар давомида тез тиббий ёрдамда навбатчи ҳамшира сифатида фаолият юритган, бироқ иш берувчи ва Ойдин Йўлдошева келишувига кўра бир муддат илгари фуқаро навбатчи ҳамшираликдан диспетчерлик лавозимида ўтказилган. Рағбатланувчилар рўйхатида эса, диспетчерлар йўқ.
«20 йиллаб навбатчи ҳамшира бўлиб ишлаганман. Тўғри, соғлиғим сабаб бундан олти ой илгари навбатчи ҳамшираликдан диспетчерликка ўтказилгандим. Энди эса рағбат пули беришмади», — дейди Ойдин Йўлдошева.
Рустам Йўлдошевнинг таъкидлашича, вилоятда 247 та тез тиббий ёрдам бригадасининг шифокор, ҳамшира ва ҳайдовчиларига 20 миллиард сўмлик рағбат пул берилган. Қолган мурожаатчилар муаммоси ҳам вилоят соғлиқни сақлаш бошқармаси масъуллари иштирокида ўрганилади ва тез орада ечимини топади.
Шунингдек, «Дарё»га шикоят қилган Қарши туман тиббиёт бирлашмаси тез тиббий ёрдам бўлимининг Навбаҳор филиали навбатчи ҳамширалари филиалда керагидан ортиқ ходим ишга олингани боис 220 минг сўм ойлик маошга ишлашаётганини, рағбат пулини ҳам етарлича олишмаганини маълум қилди.
«Бизнинг Навбаҳор филиалимизда 37 нафар навбатчи ҳамшира фаолият юритади. Ишчилар керагидан ортиқ ишга олингани сабаб атиги 220 минг сўм маошга ишлаймиз. Шунинг учун рағбат пулини ҳам етарли даражада олмадик», — дейди Дилрабо Жўраева.
Шаҳрисабз туман тиббиёт бирлашмасининг Халқобод тез тиббий ёрдам навбатчи ҳамшираси Гулҳаё Яллаеванинг маълумот беришича, у навбатчи ҳамшираларга ваъда қилинган тўрт миллион сўмнинг икки миллион сўмини олган.
Эслатиб ўтамиз, Вазирлар Маҳкамасининг 2020 йил 30 июлдаги қарори билан коронавирус инфекцияси тарқалишига қарши курашга жалб этилган тез тиббий ёрдам ходимларини рағбатлантириш учун давлат бюджетидан 100 миллиард сўм ва тадбиркор Алишер Усмонов томонидан 100 миллиард сўм ажратилганди. Қарорга кўра, тез тиббий ёрдам врачлари – 5 миллион сўм, ўрта тиббиёт ходимлари (фельдшерлар ва санитарлар) – 4 миллион сўм ва ҳайдовчилар – 3 миллион сўмдан бир марталик моддий рағбатлантирилган.
Изоҳ (0)