Ҳиндистон коронавирус инфекциясига қарши учта вакцинани синовдан ўтказмоқда ва уларни фуқароларга тарқатиш бўйича режа тайёр. «ТАСС»нинг хабар беришича, бу ҳақда 15 август куни мамлакат бош вазири Нарендра Моди маълум қилган.
«Учта вакцина синовларнинг турли босқичларида турибди. Олимлар рухсат берганида ишлаб чиқариш бўйича режамиз тайёр бўлади. Бизда вакцина қисқа вақт ичида ҳар бир ҳиндистонликка қандай етиб бориши бўйича йўл харитаси бор», — деган бош вазир.
Унинг қўшимча қилишича, соғлиқни сақлашни рақамлаштириш дастури доирасида ҳар бир ҳиндистонлик соғлиқ ҳолати бўйича идентификация картаси (Health ID card)ни олади. Фуқаролар ҳар гал дорихонага ёки шифокор кўригига борганда бу картада қайд этилади ва умуммиллий даражадаги профилда акс этади. «Шифокор рецептидан тортиб тавсия қилинган доригача барчаси саломатлик профилида қайд этилади», — деб таъкидлаган Моди.
Бош вазир, шунингдек, пандемияга қарши курашаётган барчага миннатдорчилик билдирган.
Аввалроқ Ҳиндистонда Bharat Biotech компанияси томонидан коронавирусга қарши Covaxin вакцинаси клиник синовининг биринчи босқичи муваффақиятли ўтказилаётгани, Zydus Cadila фармацевтика компанияси COVID-19 даволаш учун вирусга қарши Ремдаc номли дори воситасини сотишни бошлагани ҳақида хабар берилган эди.
Изоҳ (0)