Россияда ўлат қўзғатувчилари топилди. Тува ва Олтойда аҳоли вакцинация қилинмоқда

Тува Роспотребнадзор бошқармаси ходимлари минтақанинг Овюр ҳамда Монгун-Тайга туманларида ўлат қўзғатувчисининг табиий ўчоқларини аниқлади. Ўлат эпизоотияси умумий майдони 340,1 квадрат километр бўлган Бора-Шайск, Саглинск, Каргинск ва Кара-Белдир мезоўчоқларида ҳам қайд этилган, деб хабар беради National Geographic.

Овюр туманида хавф 3 мингдан ортиқ аҳоли истиқомат қиладиган Хайдагайт посёлкаси ҳудудида аниқланган. Эпидемиология отряди ходимлари бу ерда зудлик билан дезинфекция ишларини амалга ошириб, қишлоқ атрофидаги тўрт минг гектар майдонни ўлат ташувчиларидан тозалаган.

Шунингдек, Yersinia pestis ўлат таёқчаси касаллиги қўзғатувчиси Туванинг Олтой билан чегарасида жойлашган Укок платосидан ҳам топилган. Олтой ўлатга қарши станцияси директори ўринбосари Александр Мишеконинг маълум қилишича, бу каби ҳолат 60 йилдан буён биринчи бор қайд этилмоқда.

«Сўнгги йилларда эпизоотик ҳудудларнинг фаол кенгайиши кузатилмоқда. Айниқса, сўнгги 60 йил ичида биринчи бор шу йилнинг июлида Укок платосида қайд этилган ўлат эпизоотияси хавфли ҳисобланади. Укок платосига кўплаб туристлар ташриф буюради. Плато ҳудудидан Жазатор қишлоғи чорвадорлари қишлашда фойдаланади», — дейди Александр Мишенко.

Эпизоотия — маълум бир ҳудуддаги бир ёки кўплаб ҳайвон турлари орасида инфексион касалликларнинг тарқалишига айтилади. Бошқача қилиб айтганда, ҳайвонлар эпидемияси.

Касалликнинг одамларга юқиши биринчи навбатда молларни сўйиш, браконьерлик овлари, шунингдек, касалланган ҳайвоннинг бурга ёки жўлаклар чақиши оқибатида юзага келиши мумкин.

Тувадаги Шолбан Кара-оол раҳбари инфекцияси ўчоғи яқинида яшовчи 14 минг аҳолини иммунизация қилиш бўйича топшириқ берган. Олтой Республикасида эса 18 090 киши вакцинация қилинган. Шунингдек, маҳаллий туяларга ҳам вакциналанган.

МДУ Биология факультети Вирусология кафедраси профессори Алексей Аграновскийнинг таъкидлашича, Россия аҳолиси орасида ўлат тарқалиш эҳтимоллиги минимал.

Июль ойининг бошларида Хитой шимолидаги Баян-Нур шаҳрида қора ўлат хавфининг учинчи даражаси эълон қилингани тўғрисида хабар берилганди.