Сирдарёда Nexia ҳамда Isuzu юк машинаси иштирокида йўл транспорт ҳодисаси содир бўлди. Бу ҳақда вилоят ИИБ ахборот хизмати хабар қилган.
Ҳодиса 2020 йил 13 август куни соат 18:00 да юз берган. М.А. бошқарувидаги оқ Nexia Сирдарё шаҳрида ҳайдовчи М.С. бошқариб келаётган Сирдарё тумани ободонлаштириш бошқармасига тегишли Isuzu юк машинасининг олд қисмига урилган. Енги автомобиль ЙТҲ оқибатида ағдарилган.
Тўқнашувдан кейин машинанинг ағдарилиши Nexia ичидаги йўловчи А.И.нинг ўлимига сабаб бўлди, фуқаро олган оғир тан жароҳатлари туфайли воқеа жойида ҳалок бўлган.
Хабарда Nexia’нинг қандай тезликда ҳаракатлангани, ЙТҲ оқибатида ҳалок бўлган йўловчининг жинсига аниқлик киритилмаган.
Сирдарёда Nexia Howo юк машинаси билан тўқнашиши оқибатида ҳайдовчи ҳалок бўлгани, Isuzu урган Lacetti ёниб кетгани, шунингдек, вилоятнинг Гулистон туманида икки Nexia тўқнашиши оқибатида машиналардан бири ичидаги бир нафар йўловчи олган тан жароҳатлари оғирлигидан вафот этгани ҳақида хабарлар берилган.
Изоҳ (0)