Беларусь президентининг иқтидорли ёшларни, истеъдодли талабалар ва ўқувчиларни қўллаб-қувватлаш бўйича махсус жамғармаси стипендиантлари, лауреатлари, мукофот ва диплом эгалари унвон ҳамда имтиёзлардан воз кечди. Бу борадаги очиқ хат Tut.by’да эълон қилинган.
Фото: «ТАСС»
«Президент мамлакатда ўз ватандошларини алдаш ва шафқатсиз калтакланишга йўл қўяётган бир пайтда, президент стипендияси лауреати унвонини кўтариб юришнинг имкони йўқ. Ушбу номни кўтариб юришдан уялишимизни маълум қиламиз», — дейилади хатда.
Мукофотдан воз кечганларнинг таъкидлашича, «ғазаб ва қўрқув муҳити ҳукмронлик қилаётган» давлатда «беларуслар ўзларини хавфсиз ҳис қилмаяпти», президентлик сайлови натижалари эса «кўплаб Беларусь фуқароларида шубҳа уйғотмоқда».
«Халқ ўз танловини амалга оширди, бироқ нима сабабдан ушбу танлов эътиборга олинмади… Биз ушбу президентлик кампаниясининг расмий натижаларини тан олмаймиз», — дейди хат муаллифлари.
Хат муаллифлари сиёсий маҳбусларни ҳамда норозилик намойиши вақтида қўлга олинганларнинг озод қилинишини, куч тузилмалар томонидан зўравонликларнинг ҳамда мустақил ОАВ журналистларини таъқиб қилиниши тўхтатилишини талаб қилган.
Эслатиб ўтамиз, Беларусда 9 август куни президент сайлови бўлиб ўтди. Сайлов куни Минск марказида ҳарбий техника пайдо бўлди. Беларусь милицияси сайлов участкалари олдида тўпланган одамларни қўлга олди. Сайлов куни оқшомида мамлакатнинг барча етакчи оммавий ахборот воситаларининг сайтлари очилмай қолди. Пойтахт Минскда президент сайловидан кейин норозилик намойиши бошланди.
