Олимлар «Сомон йўли» галактикасининг энг қадимий «эгизагини» аниқлади

Астрономлар шакли ва ўлчами жиҳатидан «Сомон йўли»дек келадиган галактикалар Катта портлашдан 1,4 миллиард йил ўтиб пайдо бўлган деган хулосага келди. Бу борадаги тадқиқот натижалари Nature илмий журналида чоп этилган.

Олимлар «Соатлар» юлдузлар туркумидан ҳозирга қадар энг қадимий деб ҳисобланаётган объектни — SPT0418-47 галактикасини аниқланган.

«Ушбу кашфиёт яқин спирал галактикалар ва ‘Сомон йўли’даги худди шу каби тузилмалар 12 миллиард йил олдин ҳам мавжуд бўлганини кўрсатмоқда», — дейди Маск Планк жамияти Астрофизика институти астрономларидан бири Франческо Риццо.

Мутахассисларнинг ҳисоблашича, коинотда дастлабки галактикалар Катта портлашдан 300-400 миллион йил ўтиб пайдо бўлган. Бу вақт давомида унинг материяси юлдузлар пайдо бўладиган газли совуқ булутлар шаклланиши учун етарли бўлган ҳароратга етган.

Рицсо ҳамда унинг ҳамкасблари SPT0418-47’ни ALMA микротўлқинли телескопи ёрдамида кузатган. Ушбу галактикадан ёруғлик Ерга 12 миллиард йилдан ортиқроқ вақтдан бери келмоқда. Шу сабабли ҳозирда мутахассислар уни Катта портлашдан тахминан 1,4 миллиард йил ўтгандан кейинги ҳолатда кўрмоқда.

Олимлар SPT0418-47’ни ундан яқинроқда жойлашган бошқа галактика сабаб кўришга муваффақ бўлган. У гравитацион линза вазифасини бажарган. Астрономлар машина ўрганиш усуллари ёрдамида SPT0418-47’нинг асл шаклини тиклаган: дастлабки суратларда у деярли идеал ҳолатдаги ҳалқа шаклида тасвирланган.

Кейинроқ эса, ушбу галактика шакли барча қадимий галактикалар сингари «Сомон йўли»никига ўхшашлиги маълум бўлган.