Беларусда 9 август куни президент сайлови бўлиб ўтди. Овоз бериш жараёни якунига етгач, амалдаги президент Александр Лукашенконинг энг асосий рақиби сифатида эътироф этилаётган президентликка номзод Светлана Тихановская матбуот анжуманида чиқиш қилди. Унинг сўзларини Meduza келтирмоқда.

Светлана Тихановская.

Фото: Meduza

«Мен бунга ишонгандим. Бутун сайлов кампанияси Беларусь халқининг улкан қўллаб-қувватловини намоён этди. Жуда кўплаб одамлар намойишларга чиқди, бунақаси бизнинг Беларусда ҳеч қачон бўлган эмас. Кузатувчилар сони ақл бовар қилмас даражада кўп эди, ҳаммаси ҳам ўхшамади, лекин биз қўлимиздан келганича ҳаракат қилдик. Ҳалол ҳисоб-китоб қилган сайлов комиссияларига ҳам алоҳида миннатдорлик билдиришни истардим, бу ҳам бир жасорат. Одамларимиз уйғонди. Улар сиёсий ҳаётда фаол иштирок эта бошлаганидан жуда хурсандман. Одамлар ва ниҳоят ўз қўрқувларини енгиб ўта олишди. Ҳали яна кўпчилик шундай қилиши керак. Ҳаммага — штабларга, кўнгиллиларга, ёнимизда бўлган ҳаммага ташаккур! Менимча, биз ғолиб чиқдик, чунки биз ўз қўрқувимиз устидан ғалаба қозондик, сиёсатга аралашмаслигимизни енга олдик, лоқайдлик ва бефарқлигимизни мағлуб этдик. Бу бошқа ҳар қандай ғалабадан кўра муҳимроқ ғалабалардир», — Светлана Тихановская.