Яккасаройда хитойлик аёлнинг 5000 АҚШ доллари, 2 миллион сўм пулини талон-тарож қилган шахслар қўлга олинди

Тошкент шаҳри Яккасарой туманида Хитой фуқаросини тунаган шахслар қўлга олинди, деб хабар бермоқда Тергов департаменти.

Маълум қилинишича, 2020 йилнинг 3 август куни соат 22:40 да, Яккасарой тумани Бобур кўчасида Хитой фуқароси 24 ёшли Д.Й. (аёл) бошқарувидаги Lacetti русумли автомашинасида тўхтаб турган вақтида 2 нафар номаълум шахс унинг автомашинасига ўтириб олган. Сўнгра уни ҳар хил сўзлар билан чалғитиб, автомашинасида бўлган аёллар сумкаси, уни ичидаги фуқаролик паспорти,  ҳайдовчилик гувоҳномаси, 5000 АҚШ доллари, 2 миллион сўм пули, қўл соати ва Хитой банкларига тегишли банк карталарини очиқдан очиқ талон-торож қилиб, ҳодиса содир бўлган жойдан яширинган.

Мазкур ҳолат юзасидан Яккасарой тумани бўйича ИИО ФМБ ҳузуридаги Тергов бўлинмаси томонидан Жиноят кодексининг 166-моддаси 2-қисми «в» банди (талончилик) билан жиноят иши қўзғатилиб дастлабки терговга киришилган.

Олиб борилган дастлабки тергов ва тезкор-қидирув ҳаракатлари натижасида мазкур жиноятни 23 ёшли М.С. ва 25 ёшли М.А. содир этганлиги аниқланиб, улардан ашёвий далил тариқасида 3 400 АҚШ доллари ўрнатилган тартибда олинган.

М.С. ва М.А. айбланувчи тариқасида жалб қилиниб, уларга нисбатан «қамоққа олиш» тарзидаги эҳтиёт чораси қўлланилган.

Ҳозирда жиноят иши бўйича дастлабки тергов ҳаракатлари давом этмоқда.