Дортмунднинг «Боруссия» клуби ҳужумкор ярим ҳимоячиси Жейдон Санчо «Манчестер Юнайтед»га ўтишга яқин турибди.

Фото: The Sun

The Guardian журналисти Фабрицио Романонинг хабар қилишича, жамоалар 20 ёшли футболчи трансфери борасида келишувга эришишга яқин.

Таъкидланишича, «Манчестер Юнайтед» трансфер пулини бўлакларга бўлган ҳолда бир неча йил ичида тўлаб бермоқчи. Ҳозирча якуний келишувга эришилмаган, аммо музокаралар давом этмоқда.

«Манчестер Юнайтед»да Санчонинг ўзи билан ҳеч қандай муаммо йўқ, улар аллақачон шахсий шартнома борасида келишиб қўйган. У 2025 йилга қадар мўлжалланган бўлади. Ҳозирда футболчи клублар ўзаро келишиб олишини кутмоқда. Аввалроқ дортмундликлар Санчони 120 миллион евродан камига қўйиб юбормаслиги хабар қилинганди.

«Боруссия» барча масалалар август ойида ҳал бўлишини истамоқда, сабаби Жейдон кетадиган бўлса, унга ўринбосар сотиб олиниши зарур.

Жейдон Санчонинг «Боруссия Д» сафидаги топ-20 голи ва ассистлари (видео)

Англиялик футболчининг «арилар» билан амалдаги шартномаси 2022 йилга қадар мўлжалланган. Санчо Бундеслига жорий мавсумида 32 та ўйин ўтказиб, 17 гол ва 16 та голли узатмага муаллифлик қилди.

Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!