Чирчиқдаги шифокорлар: «Меҳнат шартномаси йўқ, беморлар учун дорилар йўқ»

«Anhor.uz» нашри Чирчиқ давлат педагогика институти ётоқхонаси базасида ташкил этилган вақтинчалик касалхонага ишга қабул қилинган бир гуруҳ тиббиёт ходимларидан келиб тушган мурожаат билан бўлишди. Тиббиёт ходимлари Соғлиқни сақлаш вазирлигининг айрим ҳудудий органлари раҳбарларини масъулиятсизликда айблаган.

Олий Мажлис Қонунчилик палатаси депутати Н.Собировга Чирчиқ давлат педагогика институти ётоқхонаси қошида ташкил этилган провизор касалхонасининг тиббиёт ходимларидан

МУРОЖААТ

Ўзбекистон Президенти Шавкат Мирзиёевнинг Тошкент шаҳри ва пойтахт вилоятида пандемия билан боғлиқ ҳолат ҳамда уни барқарорлаштиришга оид қарори юзасидан Тошкент вилояти Чирчиқ шаҳрида провизор шифохонаси ташкил этган бўлиб, бизни бу ерга мажбуран жалб этишди.

Ишга келганимизда вилоят Соғлиқни сақлаш бўлими бошлиғи ўринбосари Н.Х. ҳамда Чирчиқ шаҳар тиббиёт бирлашмаси раҳбари Д.Х.Умруллаев билан суҳбатлашган эдик, улар «Бизда COVID-19’га чалинганлар бўлмайди, пневмониянинг енгил шаклини даволайсизлар, 25 беморга мўлжалланган бўлинмада 1 та шифокор ва 1 та ҳамшира бўлади, икки кун ичида сизларни дори-дармон билан таъминлашади ва 6 фоиз устама оласизлар», деган эди.

Бироқ орадан 14 кун ўтган бўлса-да, бизга меҳнат шартномасини кўрсатишмади. Дори воситалари йўқ, биз беморларга ўзлари сотиб олишлари учун дорилар рўйхатини беришга мажбур бўляпмиз.

27 июль куни провизор касалхонасининг бош шифокори Ш.А. Саидмуратов бизнинг қаршилигимизга қарамасдан COVID-19 билан касалланган беморни касалхонага жойлаштирди. Унинг айтишича, COVID-19 билан касалланганларни даволаш шартномада кўрсатилган экан.

Шартномани ўқиганимизда, 1.1 банд билан 1.2 банд бир-бирига зид келаётганини кўрдик. Ушбу масала бўйича Чирчиқ шаҳар молия бўлимига қўнғироқ қилганимизда эса Чирчиқ шаҳар тиббиёт бирлашмаси бухгалтери ва иқтисодчиси 6 фоизли устамадан бошқа ҳеч қандай ортиқча пул тўланмаслиги ва шартнома бўйича ишлашимиз лозимлигини маълум қилди.

Ўзбекистон Президентининг «Коронавирус инфекцияси тарқалишига қарши курашишга жалб қилинган тиббиёт ва санитария-эпидемиология хизмати ходимларини қўллаб-қувватлашга оид қўшимча чора-тадбирлар тўғрисида»ги қарорига биноан бизга 14 кунлик меҳнат фаолиятимиз учун иш ҳақимизнинг ўз вақтида берилишини таъминлашингизни сўраймиз. Агарда қилган меҳнатимизга яраша ҳақ олсак, тиббиёт ходимлари танқислиги кузатилаётган бугунги кунда яна 14 кун ватанимиз учун хизмат қилишга тайёрмиз.

• Шуҳрат Саидмурадов; 
• Ҳусниддин Эшонқулов;
• Ғиёсиддин Қорабоев;
• Анвар Мукумов;
• Иброҳим Акромов;
• Мадина Маҳкамова; 
• Айдана Усипбаева;
• Молдир Кудайбергенова;
• Нодира Убайдуллаева;
• Айнур Тошпўлатова;
• Нурлан Исмагулов;
• Хадича Убайдуллаева;
• Нодира Ташпулатова;
• Севара Ўсарова;
• Зебо Икромова;
• Дилдора Хусанова;
• Манат Жўраева.