Туркиянинг Истанбул шаҳрида 2020 йилнинг 16 ва 30 июль кунлари Turkish Airlines авиакомпанияси томонидан ташкил этилган чартер рейсда жами 42 нафар ўзбекистонлик йўловчи парвоздан қолиб кетган. Айримларининг юклари эса Тошкентда эгаларини кутмоқда, деб хабар беради «Kun.uz».
Маълум қилинишича, Туркиянинг Истанбул шаҳрида бир неча ўн ўзбекистонлик фуқаро чартер рейсга чипта харид қилгани ҳолда рейсдан қолиб кетган.
Таъкидланишича, фуқароларга чартер рейсга навбати келгани ҳақида қўнғироқ қилиб хабар берилган, қаердан чипта олиш кераклиги айтилган, бориб 500 доллар атрофида пулини тўлаб, чипта олган, аэропортда рўйхатдан ўтган, чегара постида Туркиядан кетгани қайд қилиниб, муҳр босилган, айримларининг чиптасидаги талон қисми ҳам йиртиб олингани ҳолда рейсдан қолиб кетишган.
Маълумотларга кўра, 30 июль куни Истанбул–Тошкент–Истанбул йўналиши бўйича Turkish Airlines авиакомпанияси томонидан чартер рейс амалга оширилган. Тушунтиришларича, жами 31 ўзбекистонлик йўловчи қўлида чиптаси билан самолётдан қолиб кетган. Рейс қатновлар жадвали бўйича соат 15:30 га белгиланган ва ўз вақтида парвозни амалга оширган.
Айримларининг чиптаси ва паспортларига чегара назорати муҳри ҳам босилган. Чартер рейсдан қолиб кетганлар орасида юклари Ўзбекистонга кетганлар бор. Улар қўлларида паспорт билан қолишган холос. Ваҳоланки, улар орасида консуллик қўнғироғидан кейин 516 долларга чипта олиб, ўз вақтида аэропортга борганлар ҳам бор.
Турли йўловчилар томонидан тақдим этилган аудиоёзувларда таъкидланишича, улар «жазо тўлови»ни (Туркия миграция қонунчилигини бузгани учун тўланадиган жарима) амалга ошириш учун навбат кутиб турган вақтларида авиакомпания вакили келиб, самолёт учиб кетганини маълум қилган. Уларга кўра, консуллик рўйхатига кирмаган йўловчилар ҳам келиб, 480 доллардан чипта харид қилиб, Ўзбекистонга кетишга муваффақ бўлган. Қолаверса, мурожаатчилар самолётдаги ўриндиқлардан ортиқча чипта сотилганини ҳам иддао қилмоқда.
Истанбул аэропортида рўй берган ҳолат бўйича изоҳ олиш учун Turkish Airlines’нинг Тошкентдаги ваколатхонаси вакили билан боғланилиб, бир неча саволлар билан мурожаат қилинган. Унинг жавоблари қуйидагича бўлган:
- Туркиядаги ўзбекларни эвакуация қилиш бўйича чартер рейс рўйхатига авиакомпаниянинг умуман алоқаси йўқ, рўйхат бўйича йўловчиларга қўнғироқ қилиш ва аэропортга келиши, чипта харид қилишларини назорати Ўзбекистоннинг Истанбулдаги бош консуллиги ваколатига киради.
- Мурожаатчилар таъкидлаганидек, чартер рейсга чипталар фақат консуллик тақдим этган рўйхат бўйича сотилади, рўйхатга киритилмаган фуқароларга чипта сотилмайди. Авиакомпания вакилининг айтишича, консуллик вакили рўйхатга киритилганлар етиб келмаган тақдирда бошқа фуқароларга чипта сотишга рухсат бериши мумкин.
- Эвакуация мақсадида ташкил этилган чартер рейслар белгиланган вақтида амалга оширилади, уларни кечиктириш имкони йўқ. Махсус буюртмали чартер рейсларгина буюртмачи истаган вақтдагина парвоз қилиши мумкин.
- Чипталарнинг рўйхатга олиниши, паспортларга муҳр босилгани, ҳатто чиптанинг самолётга чиқиш талони йиртиб олингани ҳолда қолиб кетган йўловчилар ҳолати эса алоҳида ўрганилиши керак.
Мурожаатчиларнинг алоҳида уқтиришларича, ушбу чартер рейсларни назорат қилиш масъулияти Ўзбекистоннинг Истанбулдаги бош консуллиги зиммасида бўлса-да, 16 ва 30 июль кунги чартер рейсларда консулликнинг бирор ходими бўлмаган.
Нашр мухбири айни ҳолатга ойдинлик киритиш мақсадида Ўзбекистоннинг Истанбулдаги бош консуллигининг Telegram саҳифасига мурожаат қилган. Бироқ ҳозиргача жавоб келмаган.
«Шу билан бирга, бугунги кунда ‘Турк ҳаво йўллари’ томонидан ташкил этиладиган навбатдаги Истанбул–Тошкент–Истанбул рейси 14 августда амалга оширилиши инобатга олинса, аэропортда қолиб кетган ўзбекистонликларга бу муддат давомида ким томонидан, қандай ёрдам кўрсатилади, деган савол ҳамон очиқ қолмоқда», — дейилади хабарда.
Эслатиб ўтамиз, Республика махсус комиссиясининг қарорига мувофиқ, хориждаги ўзбекистонликларни олиб келиш учун 2 августдан 16 августга қадар амалга ошириладиган навбатдаги чартер рейслар жадвали тасдиқланган.
Изоҳ (0)