Жиноят ишлари бўйича Тошкент вилоят суди судьяси, 53 ёшли Хайриддин Шермуҳамедов коронавирус инфекцияси асоратларидан вафот этди. Бу ҳақида, Судьялар олий кенгашига асосланиб, «Kun.uz» хабар бермоқда.
Хабар беришларича, Тошкент вилоят суди судьяси Шермуҳамедов 31 июль куни вафот этган. Таъкидлашларича, у коронавирусга чалинган ва касалхонада даволанаётган эди.
«Судьялар олий кенгаши марҳумнинг оила-аъзолари ва яқинларига таъзия изҳор қилган», — дейилади хабарда. Қайд этиш жоиз, ушбу ўлим ҳолати ҳақида Соғлиқни сақлаш вазирлиги (ССВ) томонидан маълумот берилмаган.
Маълумот учун: ССВ ҳисоби бўйича, 1 август соат 10:00 ҳолатига кўра Ўзбекистонда 143 киши коронавирус инфекцияси асоратларидан вафот этган. Ҳозиргача ССВ томонидан тасдиқланмаган, бироқ Давлат хизматлари агентлиги (битта ҳолат), Маданият вазирлиги (битта), Олмалиқ шаҳар Санитария-эпидемиологик осойишталик маркази (иккита), Бош прокуратура (битта), ССВ ҳузуридаги Санитария-эпидемиологик осойишталик агентлиги (битта) томонидан эълон қилинган яна олтита ўлим ҳолати бор; Судьялар олий кенгаши томонидан тасдиқланган судья Шермуҳамедов билан боғлиқ ҳолат ҳам ҳисобга олинса, «Дарё» ҳисоби бўйича ҳозиргача Ўзбекистонда расман 150 киши вафот этган.
Изоҳ (0)