Ўзбекистонда 2020 йил 29 июль соат 23:30 ҳолатига кўра яна 211 нафар кишида коронавирус инфекцияси борлиги аниқланди ва касалланганларнинг умумий сони 22 585 нафарга етди. Бу ҳақда Соғлиқни сақлаш вазирлиги хабар берди.
Янги касалланиш ҳолатларининг
- 111 таси Тошкент шаҳрида;
- 47 таси Сурхондарё вилоятида;
- 34 таси Тошкент вилоятида;
- 19 таси Хоразм вилоятида коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган.
Шунингдек, 29 июлда кун давомида Тошкент шаҳрида 323 нафар, Тошкент вилоятида 148 нафар, Сурхондарё вилоятида 93 нафар, Сирдарё вилоятида 29 нафар, Андижон вилоятида ҳам 29 нафар, Фарғона вилоятида 19 нафар, Наманган вилоятида 17 нафар ҳамда Қашқадарё вилоятида 14 нафар, жами 672 нафар бемор тузалиб, рекорд натижа қайд этилди.
Ўзбекистонда коронавирус инфекциясидан тузалганлар сони 12 937 нафарни (57 фоиз) ташкил қилмоқда. 9 517 нафар беморга шифокорлар белгиланган стандартлар бўйича даво чораларини кўрмоқда.
Эпидемия бошланганидан бери Соғлиқни сақлаш вазирлиги 131 нафар беморнинг коронавирус асоратлари оқибатида вафот этганини хабар қилган. «Дарё» ҳисоби бўйича коронавирусга чалингач, инфекция асоратлари оқибатида вафот этганлар сони 137 нафарни ташкил этмоқда.
Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган.
Шунингдек, 22 июлда Бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов, Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова коронавирус асоратларидан вафот этгани хабар қилинган. Бироқ ушбу олти ҳолат ҳақида ССВ томонидан айни вақтгача ахборот берилмади.
Изоҳ (0)