29 июль куни кун давомида жами 672 нафар коронавирус инфекциясига чалинган бемор COVID-19’дан фориғ бўлди. Бу ҳақда Соғлиқни сақлаш вазирлиги хабар қилган.
Тузалганларнинг 323 нафари Тошкент шаҳридаги 18 та шифохонада даволанаётган беморлар. Шунингдек, уларнинг 148 нафари Тошкент вилоятида, 93 нафари Сурхондарёда, 29 нафари Андижонда, яна 29 нафари Сирдарёда, 19 нафари Фарғонада, 17 нафари Наманганда, 14 нафари Қашқадарёда касалликдан соғайган.
Соғайганлар кўрсаткичи бўйича сўнгги рекорд натижа 28 июль куни қайд этилган ва шу куни Ўзбекистоннинг турли ҳудудларида 591 нафар бемор инфекциядан тузалганди.
Ўзбекистонда 12 937 нафар коронавирус инфекциясига чалинган фуқаролар (57 фоиз) касалликдан соғайган.
Соғлиқни сақлаш вазирлиги ҳисобига кўра, эпидемия бошланганидан буён 131 нафар бемор COVID-19 асоратлари оқибатида вафот этган. «Дарё» ҳисоби бўйича коронавирусга чалингач, инфекция асоратлари оқибатида вафот этганлар сони 137 нафарни ташкил этмоқда.
Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган.
Шунингдек, 22 июлда Бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов, Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова коронавирус асоратларидан вафот этгани хабар қилинган. Бироқ ушбу олти ҳолат ҳақида ССВ томонидан айни вақтгача ахборот берилмаган.
Изоҳ (0)