Тошкент шаҳрида коронавирусга чалинган 48 ёшли эркак вафот этди. Бу ҳақда Соғлиқни сақлаш вазирлиги хабар қилган.
Вазирлик жамоатчилик билан алоқалар бўлимининг маълум қилишича, Чилонзор туманида яшаган 48 ёшли Х.М. исмли эркак 13 июль куни Тошкент тиббиёт академиясининг кўп тармоқли клиникасининг жонлантириш бўлимига оғир аҳволда ётқизилган.
Беморга COVID-19 инфекциясининг ўта оғир кечиши ва икки томонлама пневмония ташхиси қўйилган.
Беморда касаллик ўткир респиратор дистресс синдроми, ўткир нафас етишмовчилигининг 3-даражаси, терминал ўпка шиши, полиорган етишмовчилик асоратлари билан кечган.
Шунингдек, беморда юрак ишемик касаллиги, зўриқиш стенокардияси, гипертония, артериал гипертензиянинг 2-даражаси каби ҳамроҳ касалликлар ҳам кузатилган.
Шифохонада беморнинг даволаниши давомида шифокорлар томонидан консультация ва консилиумлар қилинган, даволаш жараёни мутахассислар тавсияси асосида олиб борилган.
«Асосий касаллик асоратлари ҳисобига беморнинг аҳволи стабил оғир бўлиб, мутахассислар томонидан ўтказилган реанимацион чораларга қарамай, Х.М. ўткир нафас ва юрак қон-томир етишмовчилиги, ўпка шиши, полиорган етишмовчиликдан вафот этган», – дейилади ССВ хабарида.
Соғлиқни сақлаш вазирлиги ҳисобига кўра, 48 ёшли Х.М. коронавируснинг 130-қурбонига айланди. «Дарё» ҳисоби бўйича коронавирусга чалингач, инфекция асоратлари оқибатида вафот этганлар сони 136 нафарни ташкил этмоқда.
Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган.
Шунингдек, 22 июлда Бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов, Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова коронавирус асоратларидан вафот этгани хабар қилинган. Бироқ ушбу олти ҳолат ҳақида ССВ томонидан айни вақтгача ахборот берилмаган.
Изоҳ (0)