Соғлиқни сақлаш вазирлиги Тошкентда коронавирусга чалинган 22 ёшли ҳомиладор аёлнинг вафот этганини хабар қилди.
ССВ ахборотига кўра Тошкент шаҳрининг Учтепа туманида яшаган 22 ёшли О.Х. 15–18 июль кунлари Тошкент шаҳар 9-сон туғруқ комплекси жонлантириш бўлимида 2-ҳомиладорлик, 2-туғруқ, ўткир камсувлик, икки томонлама пневмония ташхиси билан стационар шароитида даволанган.
18 июль куни беморда COVID-19 инфекцияси борлиги тасдиқланган. Шундан кейин у Тошкент шаҳар 3-сон туғруқ комплексига ўтказилган. Ушбу шифохонада О.Х.га COVID-19 инфекциясининг оғир кечиши, икки томонлама пневмония ташхиси қўйилган. Касаллик ўткир нафас ва юрак-қон томир етишмовчилиги асорати билан кечган.
Шифохонада беморнинг даволаниши давомида шифокорлар томонидан консультация ва консилиумлар қилинган, даволаш жараёни мутахассислар тавсияси асосида олиб борилган.
Бироқ шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашган. О.Х. ўткир нафас ва юрак қон-томир етишмовчилигидан вафот этган.
Соғлиқни сақлаш вазирлиги кетма-кет беш кундан буён коронавирусга чалинган ҳомиладор аёлларнинг ўлими ҳақида хабар бермоқда. О.Х. беш кун ичида COVID-19 асоратлари оқибатида вафот этган еттинчи ҳомиладор аёл.
Аввал ССВ Тошкент шаҳрида 28 июль куни коронавирусга чалинган 40 ёшли ва 34 ёшли икки ҳомиладор аёлнинг, 27 июль куни 35 ёшли ва 32 ёшли ҳомиладор аёлларнинг вафоти ҳақида хабар берганди. 26 июль куни коронавирусга чалинган 34 ёшли яна бир тошкентлик ҳомиладор аёл вафот этган. 24 июль куни Қашқадарёда 35 ёшли ҳомиладор аёл коронавирус қурбони бўлгани ҳақида хабар берилган.
Вазирлик касаллик оқибатида вафот этган яна бир аёл ҳақида хабар бермаган. Расман тасдиқланмаган маълумотларга кўра, вафот этгани ҳақида 9 июль куни хабар берилган 28 ёшли жиззахлик аёл ҳам ҳомиладор бўлган.
Соғлиқни сақлаш вазирлиги ҳисобига кўра, 22 ёшли О.Х. коронавируснинг 131-қурбонига айланди. «Дарё» ҳисоби бўйича коронавирусга чалингач, инфекция асоратлари оқибатида вафот этганлар сони 137 нафарни ташкил этмоқда.
Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган.
Шунингдек, 22 июлда Бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов, Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова коронавирус асоратларидан вафот этгани хабар қилинган. Бироқ ушбу олти ҳолат ҳақида ССВ томонидан айни вақтгача ахборот берилмаган.
Изоҳ (0)