Асаджон Хўжаев Ўзбекистон Республикаси Президенти администрацияси ҳузуридаги Ахборот ва оммавий коммуникациялар агентлигига директор этиб тайинланди. Бу ҳақда «Халқ сўзи Online» хабар қилган.
Асаджон Хўжаев 2003–2004 йилларда Ўзбекистон Республикаси Президенти ҳузуридаги Миллий хавфсизлик кенгаши аппаратининг етакчи консултанти, Ахборот-коммуникация технологиялари ва ахборот хавфсизлигини ривожлантириш лойиҳаси раҳбари ўринбосари лавозимларида ишлаган.
2004–2011 йилларда Ўзбекистон алоқа ва ахборотлаштириш агентлиги бош директорининг ўринбосари, 2011-2012 йилларда Ўзбекистон Республикаси Интеллектуал мулк агентлиги бош директори, 2012-2017 йилларда Алишер Навоий номидаги Ўзбекистон Миллий кутубхонаси директори, 2017 йилда Ўзбекистон Республикаси бош вазири аппарати мудири, Ўзбекистон Республикаси Президенти давлат маслаҳатчиси ўринбосари – Ўзбекистон Республикаси Президенти Матбуот хизмати раҳбари каби лавозимларда фаолият кўрсатган.
Хўжаев 2019 йил 14 ноябрда Ўзбекистон Ахборотлаштириш ва телекоммуникациялар соҳасида назорат бўйича давлат инспекциясининг бошлиғи этиб тайинланганди. У бунга қадар 2018 йилнинг августидан бошлаб Ахборот хавфсизлиги ва жамоат тартибини таъминлашга кўмаклашиш маркази, кейинчалик 2018 йил ноябрь ойидан «Хавфсиз шаҳар» жамоат тартибига кўмаклашиш маркази директори лавозимларида ишлаган.
Эслатиб ўтамиз, 2020 йил 29 январда Президент администрацияси ҳузуридаги Ахборот ва оммавий коммуникациялар агентлиги (АОКА)да администрация раҳбари Зайнилобиддин Низомиддинов бошчилигида кенгайтирилган мажлис бўлиб ўтган ва АОКА директори вазифасини бажарувчи Комил Алламжонов ва директор ўринбосари Саида Мирзиёева келгуси меҳнат фаолиятларини нодавлат секторда давом эттириш режалари билан боғлиқ мурожаатларини Президент администрациясига киритгани ва Президент администрацияси томонидан ушбу мурожаатлари кўриб чиқилиб, қондирилгани ҳақида эълон қилинганди.
Изоҳ (0)