Ўзбекистонда коронавирус билан касалланиб вафот этаётган беморларда COVID-19 лаборатория таҳлилларида тасдиқлансагина улар расмий статистикага қўшилмоқда. COVID-19 касаллигининг клиник белгилари кузатилган, аммо касаллик лаборатория таҳлилида тасдиқланмаган ўлимлар айни пайтда расмий статистикага қўшилмаяпти. Бу ҳақда 30 июль куни ўтказилган брифингда коронавирусга қарши кураш штаби аъзолари Ҳабибулла Оқилов ва Анвар Алимов маълум қилди.

Фото: «Дарё»

Анвар Алимовнинг айтишича, Жаҳон соғлиқни сақлаш ташкилотининг Европа бюроси бир қатор мамлакатлар, хусусан, Ўзбекистон билан коронавирус оқибатида юзага келадиган ўлимларни ҳисобга олиш бўйича муҳокамалар олиб борган. Муҳокамаларга иккита масала қўйилган.

Биринчи масала — COVID-19 тасдиқланган беморларнинг ўлим кўрсаткичи. Иккинчи масала эса касаллик ташхиси лаборатор жиҳатдан қўйилмаган, аммо клиник белгилар мавжудлиги натижасида келиб чиқадиган ўлимларни COVID-19 натижасида юзага келадиган ўлимлар сонига қўшиш ҳисобланади.

«Ҳозир Россия буни қабул қила бошлади, Қозоғистон август ойидан бошлаб ўтишга келишди. Биз ҳам кейинги йиғилишда кўриб чиқмоқчимиз. Комиссияга тавсия берамиз. Комиссия тавсиямизни қабул қилса, унда COVID-19 ташхиси лабораторияда ПЗР таҳлили билан қўйилган қаторида шу ташхис қўйилмаган, аммо клиник белгилари бўлган, ўпка зотилжами ёки бошқа ҳолатлар билан вафот этганларни ҳам шу гуруҳга қўшиш масаласини кейинги йиғилишларга қўямиз. Шу асосда Европа берган тавсияга биз ўз муносабатимизни билдирамиз», — деди Анвар Алимов.

Штаб вакилининг сўзларига кўра, коронавирус ўлимлари билан боғлиқ чалкаш ҳолатнинг сабаби шундаки, COVID-19’га мўлжалланган шифохоналарда вафот этаётганлар ҳақидаги маълумотлар ўша куни ёки кейинроқ берилмоқда, бироқ COVID-19’га мўлжалланмаган касалхонада коронавируснинг клиник белгилари билан вафот этган беморлар COVID-19 қурбонлари гуруҳига қўшилмаяпти.

Ҳабибулла Оқиловнинг қайд этишича, коронавирус белгилари билан уй шароитида даволаниб, аҳволи оғирлашгач касалхонага олиб келинган, аммо коронавирусга таҳлил олишга улгурмай вафот этган беморлар COVID-19 қурбонлари қаторига қўшилмаган. Шунинг ҳисобига чалкашликлар бўлиши мумкин.

Унинг сўзларига кўра, коронавируснинг клиник белгилари билан вафот этган, аммо касаллик лаборатор таҳлилда аниқланмаган беморларни COVID-19 қурбонлари сонига қўшиш ҳақидаги таклиф маъқулланса, рақамлардаги чалкашликлар йўқолади.

Шу пайтга қадар Соғлиқни сақлаш вазирлиги мамлакатда 134 кишининг коронавирусдан вафот этгани ҳақида хабар берган. «Дарё» ҳисоби бўйича коронавирусга чалингач, вафот этганлар сони 140 нафарни ташкил этмоқда.

Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган.

Шунингдек, 22 июлда Бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов, Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова коронавирус асоратларидан вафот этгани хабар қилинган. Бироқ ушбу олти ҳолат ҳақида ССВ томонидан айни вақтгача ахборот берилмаган.

Бундан ташқари, таниқли режиссёр Сарвар Каримов ҳам 17 июль куни отаси коронавирус инфекциясидан вафот этгани, аммо унга ташхис қўйилмаганини маълум қилганди. Режиссёрнинг ўзи ва унинг бошқа оила аъзоларида коронавирус тасдиқланган. Шунингдек, 26 июль куни бош вазир ўринбосари Азиз Абдуҳакимов 24 июль куни Самарқанддаги Ипак йўли халқаро туризм университетининг 33 ёшли магистранти Ўткир Темиров касалликдан вафот этганини айтган. Маълум бўлишича, марҳум ўзида COVID-19’нинг барча белгилари бўлса-да, тест ҳам топшира олмаган, касалхонага ҳам ёта олмаган. Қорақалпоғистоннинг Тахтакўпир тумани шифохонасининг 32 ёшли тез тиббий ёрдам ҳамшираси Алия Жиемуратова 28 июль куни коронавирусдан вафот этгани ҳақида «Makan.uz» хабар тарқатди.