Ўзбекистон бош вазири ўринбосари, Республика махсус комиссияси аъзоси Азиз Абдуҳакимов «Ўзбекистон 24» телеканали орқали 26 июль куни эфирга узатилган интервьюсида ота-онаси коронавирусга чалингани, ўтган бир ҳафта ичида эса коронавирус сабаб икки яқин инсонидан айрилганини маълум қилди.
«Афсуски, коронавирус инфекцияси на ёш, на миллат, на касб, на жамиятдаги мавқени инобатга олмайди. Ҳар куни кўплаб фуқаролар ушбу инфекция билан касалланаётганини кўриб турибмиз. Шунчаки бир неча мисол келтирмоқчиман. Афсуски, менинг ота-онам ҳам ушбу касалликка чалинди, ваҳоланки мен ҳар доим улардан зарур эҳтиёт чораларини кўришни, барча карантин талабларига риоя этишни сўрагандим. Бироқ бир марта бозорга бориб-келишнинг ўзи уларнинг ҳам касалликка чалиниши учун етарли бўлди, ҳозир улар даволанишмоқда.
Яна бошқа кўплаб мисолларни ҳам келтиришим мумкин. Сўнгги икки ҳафта ичида мен жуда ҳам яқин икки инсонимни йўқотдим. Афсуски, бундай фожиа ҳар биримиз билан юз бериши мумкин. Биз жуда ҳам эҳтиёткор бўлишимиз лозим. Ҳозир коронавирус инфекцияси барча ҳудудларда тарқалаётганига гувоҳи бўляпмиз. Шу муносабат билан Республика махсус комиссияси томонидан карантин чекловларини 15 августга қадар узайтириш ҳақида қарор қабул қилинди», — деди Азиз Абдуҳакимов.
Изоҳ (0)