Коронавирусга чалинган пойтахтлик 34 ёшли бемор ўткир нафас ва юрак қон-томир етишмовчилигидан вафот этди. Бу ҳақда Соғлиқни сақлаш вазирлиги хабар бермоқда.
Тошкент шаҳар Олмазор туманида яшаган 34 ёшли Б.М. исмли аёлда 5 июль куни COVID-19 тасдиқланган ва 6 июль кунига қадар у Эпидемиология, микробиология ва юқумли касалликлар илмий-текшириш институти клиникасида даволанган.6 июль куни бемор шаҳар 3-сон туғруқ комплексига ўтказилган.
Унга COVID-19 инфекциясининг ўта оғир кечиши, икки томонлама пневмония ташхиси қўйилган бўлиб, касаллик ўткир нафас ва юрак етишмовчилиги асорати билан кечган.
Беморда 24 ҳафталик учинчи ҳомиладорлик бўлган ва асоратланган акушерлик анамнези, камқонлик каби ҳамроҳ касалликлар билан оғриган.
Асосий касаллик асоратлари ҳисобига беморнинг аҳволи оғирлашиб, мутахассислар томонидан тўлиқ ҳажмда, стандарт асосида ўтказилган реанимацион чораларга қарамай ўткир нафас ва юрак қон-томир етишмовчилигидан вафот этган.
Бир кун олдин ҳам қашқадарёлик 35 ёшли ҳомиладор аёл коронавирус асоратларидан вафот этгани маълум бўлганди.
Бу ССВ статистикаси бўйича — 111, «Дарё» ҳисоб-китобига кўра эса Ўзбекистондаги 117-ўлим ҳолати.
Изоҳ (0)