Тошкент шаҳри Шайхонтоҳур туманида яшаган 67 ёшли Т.З. (эркак)да 4 июль кунидан ҳолсизлик, тана ҳароратининг кўтарилиши, юрак тез уриши ҳамда кўкрак соҳасида оғриқ кузатилган. Шунга қарамай, Соғлиқни сақлаш вазирлигининг алоҳида қайд этишича, у уй шароитида даволанган.
11 июль куни ҳансираш, нафас сиқиши, оёқ-қўл совуши пайдо бўлгандан сўнг Эпидемиология, микробиология ва юқумли касалликлар илмий-текшириш институти клиникасига олиб келиниб, реанимация бўлимига ётқизилган.
Унга COVID-19 инфекциясининг ўта оғир кечиши, икки томонлама пневмония ташхиси қўйилган. Хасталик ўткир респиратор дистресс синдром, ўткир нафас ва юрак-қон томир етишмовчилиги, полиорган етишмовчилиги асоратлари билан кечган.
«Реанимацион муолажаларга қарамай, беморнинг аҳволи кескин оғирлашиб, ўткир респиратор дистресс синдром, ўткир нафас етишмовчилигидан вафот этган», — дея хабар бермоқда Соғлиқни сақлаш вазирлиги. Бемор айнан қачон вафот этгани расмий ахборотда маълум қилинмаган.
Ҳозиргача Соғлиқни сақлаш вазирлиги 114 кишининг коронавирус асоратларидан вафот этганини хабар берди (аввалроқ коронавирусга чалинган бекободлик 50 ёшли эркак вафот этгани ҳақида хабар берилган эди). «Дарё» ҳисоби бўйича коронавирус чалингач вафот этганлар сони 120 нафарни ташкил этмоқда.
Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган.
Шунингдек, 22 июлда Бош прокурорнинг собиқ ўринбосари, ҳозирда Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов, Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова коронавирус асоратларидан вафот этгани хабар қилинган.
Бироқ ушбу олти ҳолат юзасидан ССВ томонидан айни вақтгача ахборот берилмаган.
Изоҳ (0)