«Туронбанк»: Аҳолининг жамғарма ва муддатли депозитлари ҳажми ошиб бормоқда!
Бугун мамлакатимиз молия сектори зиммасига халқ фаровонлигини ошириш ва аҳолининг турмиш тарзини яхшилаш борасида янги ташаббусларни ҳаётга татбиқ этиш сингари масъулияти залворли бўлган вазифалар тушмоқда. Яъни шахсан давлатимиз раҳбарининг саъй-ҳаракатлари билан тижорат банклари активларида хусусий сектор улушини 15 фоиздан 60 фоизга ошириш, уларда трансформация жараёнларини жадаллаштириш, қийин аҳволга тушиб қолган ҳар бир мижознинг молиявий имкониятларини тиклаш бўйича таъсирчан механизмларни яратиш борасида аниқ чоралар белгиланиб, узоқ йиллик стратегиялар тасдиқланмоқда. Айниқса банклар, молиявий ресурсларни давлат ёрдами ва кўмагисиз, мустақил жалб қилишлари, бунинг учун эса аҳолининг жамғарма ва муддатли депозитлари улушини янада кўпайтириш ва омонатларни жалб этиш бўйича янги ёндашувларни жорий этишлари зарурлиги қайд этилмоқда.
Айни шу вазифалардан келиб чиққан ҳолда «Туронбанк» АТБ ҳам аҳолининг бўш пул маблағларини ишончли ҳимоя қилиш ва юқори фоизларда уларни кўпайтириш устида тинимсиз меҳнат қиляпти. Сўзимизни рақамлар ҳам исботлаши мумкин, яъни 2020 йил 1 июль ҳолатига банкда омонатлар қолдиғи 644,8 млрд сўмни ташкил этган бўлса, ушбу кўрсаткич ўтган йилнинг шу даврига нисбатан 286,5 млрд сўмга ўсиб, 80 фоизга кўпайган. Ушбу омонат қолдиғининг 330,4 млрд сўмини миллий валютадаги ва 314,4 млрд сўмини эса хорижий валютадаги омонатлар ташкил қилади. Аҳамиятлиси, мазкур ҳисобот даврида омонат қолдиғининг 510,7 млрд сўми муддатли омонатлар ҳиссасига тўғри келмоқда.
Яна шуни қўшимча қилиш керак, 2019 йил 1 июлидан жорий йилнинг 1 июлигача бўлган даврда банк 9 954 нафар мижозлардан миллий валютадаги омонатларга жами 428,6 млрд сўм пул маблағларини қабул қилиб, ушбу даврда 8 772 нафар омонатчига 404 млрд сўм миқдоридаги муддати келган омонатларни ўз вақтида тўлаб берган. Шунингдек, шу давр ичида 2 425 нафар мижоздан хорижий валютадаги омонатларга 33 млн АҚШ доллари жалб қилиниб, 1 231 нафар мижозга жами 13,7 млн АҚШ доллари миқдоридаги муддати келган омонатлар ўз вақтида қайтарилган.
Демакки, «Туронбанк» АТБга ишонч билдириб, ҳар ойда оиласи бюджети учун қўшимча даромад олаётган фуқароларимиз сони талайгина. Бу орқали улар ўзлари ва фарзандларининг эҳтиёжларини тўлиқ қондириш, уларнинг сифатли таълим олишларини таъминлаш, саломатликларини доимий назорат қилиш имконига эга бўлишмоқда.
Албатта, бу жараёнларда молия муассасаси Президентнинг «2020–2025 йилларга мўлжалланган Ўзбекистон Республикасининг банк тизимини ислоҳ қилиш стратегияси» тўғрисидаги фармони ҳамда «Республика банк тизимини янада ривожлантириш ва барқарорлигини ошириш чора-тадбирлари тўғрисида»ги қарорлари ижросини таъминлаш мақсадида аҳолининг бўш пул маблағларини банк депозитларига жалб қилишда қатор ишларни амалга оширмоқда. Айни вақт 30 га яқин миллий ва хорижий валютадаги жозибадор омонат турлари истеъмолчиларга таклиф этилаётган бўлиб, уларнинг сафи доимий янгиланиб бормоқда.
Масалан, жорий йилнинг биргина ўтган даври давомида аҳолига қулай ва манфаатли бўлган миллий валютада «Юксалиш», «Шоҳона онлайн» ҳамда хорижий валютада Stability, Stability online ва «Даромад» муддатли омонатлари амалиётга жорий қилинди. Мижозлар аудиторияси томонидан илиқ кутиб олинган ушбу омонатлар тезда оммалашди ва одамларимизнинг қизиқишини орттирди.
Айниқса, пандемия даврида уйдан чиқмаган ҳолда масофадан туриб онлайн режимда омонатга маблағ жойлаш мумкинлиги, бугунги синовли кунларда фуқароларимиз учун айни муддао бўлди десак адашмаган бўламиз. Жорий йилнинг 1 июль ҳолатига айни онлайн тарзда омонат очган фуқаролар сони 300 нафарга етиб, уларнинг жами омонат қолдиғи 7,9 млрд сўмни ташкил этмоқда.
Яна бир қулайлик - мамлакатимизда коронавирус инфекцияси тарқалишининг олдини олишга қаратилган карантин режимида «Туронбанк» АТБ тизимида шартнома асосида муддати тугаган омонатларни карантин режими тугагунга қадар мижозларнинг банк филиалларига ташриф буюрмасидан бир томонлама узайтириш амалиёти жорий қилинди. Шунингдек, аҳоли омонатларининг бутлигини таъминлаш мақсадида банкда омонат ва касса амалиётлари бўйича замонавий технологиялардан кенг фойдаланган ҳолда ишончли дастурий таъминотларни яратиш бўйича жисмоний шахс бармоқ излари, юз тузилишини ёки унинг шахсини тасдиқловчи ҳужжатини биометрик идентификация қилувчи дастурий қурилма ишга туширилганлигини ҳам айтиб ўтиш жоиз. Бу бўйича давлати раҳбарининг «Замонавий ахборот-коммуникация технологияларини янада жорий этиш ва ривожлантириш чора-тадбирлари тўғрисида» қарори қабул қилинган эди.
Юқоридагилардан келиб чиққан ҳолда «Туронбанк» АТБ илғор банк бизнесини юритиш, ушбу секторда рақобат муҳитини кучайтириш, аҳоли учун оммабоп, жозибадор банк хизматларини кўпайтириш, фаолиятда менежмент ва таваккалчиликларни бошқариш сифатини такомиллаштириш, энг асосийси, жамият эҳтиёжларига мос равишда ривожланиб, омонатлар жалб қилишга ва уларнинг жозибадор турларини оширишга ҳаракат қилади. Олий мақсад эса халқ розилигига эришишдир!
Реклама ҳуқуқи асосида.
