Ўзбекистон энерготизимида ишлаб чиқарилаётган ва истеъмол этилаётган электр энергияси орасида номутаносиблик вужудга келаётгани сабаб 21 июль кунидан бошлаб республика истеъмолчиларига чекловлар киритилмоқда. Бу ҳақда «Ўзбекистон МЭТ» АЖ матбуот хизматига таяниб, ЎзА хабар берди.
Республика бўйича киритилаётган чеклов миқдори тахминан 1,5–2 миллион кВт/соатни ташкил этмоқда. Бу кунлик ўртача истеъмолнинг (195,6 миллион кВт/соат) 0,8–1 фоизини ташкил этади.
Шу билан бирга, республика бўйича вақтинчалик электр таъминотидаги узилишларига қўшни Тожикистон энерготизимидан қабул қилинаётган электр энергияси импорти ҳажмининг кескин қисқариши ҳам сабаб бўлмоқда.
Маълумот учун, Тожикистонда сув танқислиги оқибатида 16 июль куни соат 02:33 да кучланиши 500 кВ бўлган «Регар» ва «Сурхон» подстанцияларини боғловчи Л-508 ҳаво электр узатиш тармоғи орқали импорт амалиёти тўхтатилган ва импорт миқдори суткалик ўртача 12 миллион кВт/соатдан 0,3 миллион кВт/соатгача камайган.
Шартномага асосан электр энергияси импорти шартномаси сентябрь ойигача бўлганлиги сабабли иссиқлик станцияларига июль ойига электр энергияси импортини қоплаш учун ёқилғи кўзда тутилмаган ва электр станциялар ускуналари таъмирга чиқарилган.
Шунга қарамасдан, жорий режимларда электр станцияларга шартномада кўзда тутилган миқдордан 10–12 фоизга кўп табиий газ етказиб берилмоқда. Аниқроғи иссиқлик электр станцияларида режага нисбатан 8 миллион кВт/соат ва ўтган йилнинг мос даврига нисбатан 25–30 миллион кВт/соат кўп электр энергияси ишлаб чиқарилмоқда.
Тожикистон энерготизимидан импорт миқдорининг кескин камайтирилиши «Нурек» сув омборига сув келишининг прогноз кўрсаткичлардан камлиги ва сув сатҳининг пастлиги сабабли Тожикистоннинг «Барки Точик» компанияси ташаббуси билан амалга оширилган.
Бундан ташқари, Ўзбекистонда 2020 йилда кузатилаётган сув танқислиги сабабли Ўзбекистон гидроэлектростанцияларида шартномавий миқдорга нисбатан кунлик 6-7 миллион кВт/соат, ўтган йилнинг мос даврига нисбатан 10-12 миллион кВт/соат кам электр энергияси ишлаб чиқарилмоқда ва бу ҳам, ўз навбатида, электр энергияси танқислигини юзага келтирмоқда.
Мавжуд ҳолатни барқарорлаштириш мақсадида «Ўзбекистон МЭТ» АЖ ўз ваколатлари доирасида «Туркменэнерго» компанияси билан электр энергияси импорти бўйича шартнома имзоланган бўлиб, 2020 йил 28 июлдан ушбу амалиёт бошланиши кутилмоқда.
Эслатиб ўтамиз, Тожикистон совуқ об-ҳаво бошлангани ва республиканинг ички эҳтиёжларини таъминлаш мақсадида Ўзбекистонга электр энергияси экспорт қилишни ўтган йилнинг декабрь ойида тўхтатган эди. 2020 йилнинг май ойида келиб Тожикистон электр энергиясини етказиб беришни тиклагани тўғрисида хабар берилган.
Изоҳ (0)