Tesla 2020 йилнинг иккинчи чорагида бухгалтер ҳисоби халқаро стандарти (GAAP) бўйича 104 миллион доллар даромад олди, дейилади автоулов ишлаб чиқарувчиларнинг чораклик ҳисоботида.
Фото: Getty Images
The Verge’нинг ёзишича, компания ўз тарихида биринчи марта кетма-кет тўрт чорак юқори даромадга эга бўлди. CNBC эса энди Tesla S&P 500 фонд индекси таркибига қўшилишга умид қилиши мумкинлигини қайд этган.
Nasdaq биржасида савдолар якунлангандан сўнг Tesla акциялари кутилганидан ҳам юқори бўлган натижаларда 6 фоизга қимматлади. 2020 йил бошидан буён Tesla акциялари 71 фоизга, сўнгги 12 ойда 140 фоизга кўтарилган. 13 январда эса бир дона акциянинг нархи биринчи марта 500 доллардан ошганди.
2020 йилнинг иккинчи чораги учун кирим 6,04 миллиард долларни ташкил этди. Бу ўтган йилга нисбатан 300 миллион долларга кам. 2019 йилнинг иккинчи чорагида Tesla 408 миллион доллар зарар кўрган.
2018 ва 2017 йиллар давомида компания чораклик йўқотишлар бўйича ўз рекордини бир неча бор янгиланганди. Хусусан, 2017 йилнинг иккинчи чорагида Tesla кўрган зарар миқдори 336 миллион долларни ташкил этган бўлса, 2018 йилнинг иккинчи чорагида бу кўрсаткич 717 миллион долларни ташкил этган.
