Россиянинг Подольск шаҳрида ўзбекистонликлар тўртинчи қават балконидан тушиб кетган болакайни қутқариб қолди. Бу ҳақда «Московский комсомолец» хабар қилган.
«Подольскда мўъжизавий ҳодиса рўй берди», – деб ёзмоқда нашр. Шаҳардаги кўп қаватли уйларнинг бирида хўжалик ишида банд бўлган ўзбекистонликлар тўртинчи қаватда 20 дақиқа осилиб турган болакайни пастда чойшаб билан ушлаб қолди.
Боланинг 21 ёшли онаси бу вақтда уйда ухлаб ётган ва воқеадан кейин полиция ходимлари етиб келганида аёлнинг маст экани маълум бўлди.
Болакайни қутқариб қолган ишчилар Бекмурод Турдиалиев ва Шербек Солиев билан бирга уйда яшовчи бошқа кишилар ҳамда 16 ёшли ўсмир бола ҳам бўлган.
«Йигитлар майса ўраётганди, кейин менга телефон қилиб, юқори қаватда болакай осилиб тургани, ойи, ойи деб бақираётганини айтишди. Учинчи қаватда яшовчи аёл чойшаб олиб келди. Биз уни ёйиб 20 дақиқа давомида осилиб турган болани қутқаришга тайёрланиб турдик. Болакайнинг қўллари чарчагач, у қулади ва чойшаб устига тушди. Биз беш киши бўлиб уни ушлаб қолдик, 16 ёшли ўсмир ҳам бизга ёрдам берди. Болакай роса бақирди, ойисини чақирди, аммо аёл унинг олдига чиққани йўқ. Уни ушлаб қолганимизда бола ерга тегмади ва жароҳат олмади», – дейди Бекмурод Турдиалиев.
Бекмурод 10 йилдан бери Подольскда яшайди ва шаҳардаги ободонлаштириш бошқармасида ишлайди. Нашр берган маълумотга кўра, у уч қиз ва бир ўғилнинг отаси. Оила январда Ўзбекистонга қайтган, ота эса карантин сабаб ҳозир бу ерда.
Болакайнинг онаси 21 ёшли Натальянинг яна бир ўғли бор, у бир ёшда. Қутқариб қолинган боланинг исми Александр, укасиники эса Максим. Аёлнинг болаларига, асосан, уларнинг 81 ёшли бувиси қараган, аммо кекса онахон ҳам касалхонага тушгач, болалар деярли қаровсиз қолиб кетган. Аёл пала-партиш ҳаёт кечиради ва болаларига эътибор бермайди.
2019 йил декабрь ойида Санкт-Петербург яқинидаги Ольгино қишлоғида ичида 50 нафарга яқин йўловчи бўлган Dragon русумидаги автобус йўлда ёниб кетган ва йўловчиларни келиб чиқиши ўзбекистонлик 43 ёшли эркак қутқариб қолганди.
Изоҳ (0)