Ўзбекистон Президентининг «Коронавирус пандемиясига қарши курашишда фидойилик кўрсатган юртдошларимиздан бир гуруҳини мукофотлаш тўғрисида»ги фармонига мувофиқ бир гуруҳ шифокорлар, ички ишлар, фавқулодда вазиятлар ва бошқа соҳа ходимлари фахрий унвон, орден ва медаллар билан мукофотланди.

Алишер Уралов.

Фото: «Gazeta.uz»

Мукофотланганлар қаторида коронавирусга қарши курашда ва хизмат вақтида касаллик юқтириб олиб, унинг асоратларидан вафот этган шифокорлар ва ички ишлар ходимлари ҳам бор. Ўлимидан сўнг 6 киши «Жасорат» медали билан тақдирланди, улардан 4 нафари тиббиёт ходими, 2 нафари эса ички ишлар органлари ходимидир. Ушбу фуқароларнинг 4 нафари коронавирус юқтириб олгач, вафот этгани ҳақида аввалроқ хабарлар берилган.

«Жасорат» медали билан мокофотланганлар қаторидан Ўртасаройдаги карантин зонасида касалланиб вафот этган марҳум шифокор Алишер Уралов ҳам ўрин олди. У Тошкент шаҳар Яккасарой туманидаги марказий поликлиникада ултратовуш ташхиси шифокори бўлиб ишлаган.

Яккасарой туман тиббиёт бирлашмасининг ходими Алишер Уралов Юқори Чирчиқ туманидаги карантин марказида хизмат олиб бориш жараёнида коронавирус билан касалланиб вафот этганди. Алишер Уралов Ўзбекистондаги коронавируснинг 21-қурбони бўлганди.

Соғлиқни сақлаш вазири Алишер Шодмонов шифокорнинг хонадонига ташриф буюриб, унинг оиласига ҳамдардлик билдирганди. Шунингдек, марҳум шифокорнинг оиласига 250 миллион сўм компенсация тўланганди.

Тошкент шаҳар Олмазор туманидаги 18-оилавий поликлиника катта ҳамшираси Феруза Тўхтаева ҳам «Жасорат» медалига муносиб деб топилди. Олмазор тумани «Мирзо Ғолиб» маҳалласида жойлашган 18-оилавий поликлиника катта ҳамшираси Феруза Тўхтаева ҳам коронавирус инфекцияси асоратлари оқибатида вафот этган.

Феруза Тўхтаева.

Фото: Олмазор тумани ҳокимлиги / Facebook

Соғлиқни сақлаш вазирлигининг маълум қилишича, 60 ёшли Феруза Тўхтаевада 8 июль куни COVID-19 тасдиқланган ва у Вирусология илмий-текшириш институти клиникасига ётқизилган. Унга COVID-19 инфекциясининг ўта оғир кечиши, икки томонлама пневмония ташхиси қўйилган. Шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир нафас ва юрак-қон томир етишмовчилигидан вафот этган. ССВ ҳамширанинг вафот этганини 20 июль куни маълум қилган. Бу ССВ статистикаси бўйича 88-ўлим ҳолати бўлган.

Ички ишлар тизимидаги коронавирус қурбонларидан бири — Тошкент шаҳар Ички ишлар бош бошқармаси Молия ва моддий-техника таъминоти бошқармаси бўлим бошлиғининг ўринбосари, майор Аълохон Шомаҳмудов «Жасорат» медалига муносиб кўрилди.

Аълохон Шомаҳмудов.

Фото: ИИВ матбуот хизмати

Ички ишлар вазирлиги матбуот хизмати 13 июль куни Тошкент шаҳар ИИББ Ахборот технологиялари, алоқа ва ахборотни ҳимоялаш бўлими бошлиғи ўринбосари, майор Аълохон Абзалович Шомаҳмудовнинг вафот этганини эълон қилди. «Дарё» манбаси мазкур ходим коронавирус инфекцияси асоратлари оқибатида вафот этганини тасдиқлади. Соғлиқни сақлаш вазирлиги эса ИИББ майорининг вафоти ҳақида 16 июль куни расмий маълумот берди. У коронавирус оқибатида Ўзбекистонда вафот этган 70-бемор бўлди.

Коронавирус оқибатида ҳаётдан кўз юмган Ички ишлар вазирлиги Миграция ва фуқароликни расмийлаштириш бош бошқармасининг бўлим бошлиғи Шавкат Нафасов ҳам «Жасорат» медали билан тақдирланганлар қаторига кирди.

Шавкат Нафасов.

Фото: ИИВ матбуот хизмати

Ички ишлар вазирлиги матбуот хизмати томонидан 14 июль куни ИИВ Миграция ва фуқароликни расмийлаштириш бош бошқармаси бўлими бошлиғи подполковник Шавкат Носирович Нафасовнинг вафоти муносабати билан таъзия эълон қилинди. «Дарё» манбаси мазкур ходимнинг ҳам коронавирус инфекцияси асоратлари оқибатида вафот этганини тасдиқлади. Соғлиқни сақлаш вазирлиги Шавкат Нафасовнинг коронавирусдан вафот этгани ҳақида 16 июль куни хабар берди. ИИВ подполковнигининг вафоти Ўзбекистонда коронавирус оқибатида юзага келган 71-ўлим бўлди.

Шунингдек, фармонга мувофиқ Республика шошилинч тиббий ёрдам илмий маркази Жиззах филиали директорининг даволаш ишлари бўйича ўринбосари, марҳум Ҳамроқулов Ботир Жабборович ҳам «Жасорат» медали билан мукофотланди. Унинг ўлими сабаби ҳақида расмий маълумотлар йўқ. Жиззахда ҳозиргача 72 ва 70 ёшли эр-хотин ҳамда 28 ёшли аёлнинг коронавирус асоратларидан вафот этгани ҳақида хабар берилган.

«Жасорат» медали билан тақдирланганларнинг яна бири Республика шошилинч тиббий ёрдам илмий маркази Қорақалпоғистон филиали неврология бўлими катта ҳамшираси Зулфия Жуманиёзова бўлиб, унинг фамилияси фармонда Джуманиязова деб кўрсатилган. Унинг ўлими ҳақида ҳам расмий хабарлар йўқ. Аммо Санитария-эпидемиология назорати давлат инспекцияси раҳбари Нурмат Отабеков 23 июлдаги брифингда Қорақалпоғистонда бир ҳафта олдин бир шифокор ва бир ҳамшира коронавирусга чалиниб вафот этганини маълум қилди. ССВ ҳозиргача Қорақалпоғистонда бир эркак ва бир аёлнинг вафоти ҳақида хабар берган, аммо ўтган ҳафтада эмас. Қорақалпоғистонда коронавируснинг биринчи қурбони Нукус шаҳрида яшовчи 56 ёшли З.Д. исмли аёл эди. Унинг исм-шарфининг бош ҳарфлари қорақалпоғистонлик ҳамширанинг исм-фамилиясининг бош ҳарфларига тўғри келмоқда. Аммо ССВ хабарида З.Д.да коронавирус аломатлари кузатилса ҳам, у ҳеч кимга хабар қилмай, 6 кун давомида уйда даволанишга урингани ёзилганди.

Қайд этиш жоизки, коронавирус асоратларидан вафот этган бошқа шифокорлар ва ички ишлар органлари ходимлари ҳам бор. Улар мукофотланганлар орасида йўқ. Хусусан, Сирдарё вилоятида коронавирусдан вафот этган илк бемор ҳам 69 ёшли тиббиёт ходими бўлган. Бундан ташқари, Қорақалпоғистонда яна бир шифокор коронавирус қурбонига айланганини Нурмат Отабеков тасдиқлаганди.

Шу билан бирга, Тошкент шаҳар Сергели тумани бўйича ИИО ФМБ подполковниги Абдулазиз Тошев, Ички ишлар вазирлиги Йўл ҳаракати хавфсизлиги бош бошқармаси Ахборот хизмати катта мутахассиси, подполковник Зойир Сайдалиев ҳам коронавирус асоратлари оқибатида вафот этган.