АОКАда 2020 йилнинг 22 июль куни 2020—2021-ўқув йили учун ОТМларнинг бакалавриат таълим йўналишларига абитуриентларни онлайн рўйхатга олиш таҳлилларига бағишланган матбуот анжумани ташкил этилди.
Фото: UzReport
«Дарё» мухбирининг хабар беришича, ДТМ вакили бу йилги имтиҳон неча сменада ўтказилишига оид саволга шундай жавоб қайтарди:
«Бу йил 1,5 миллионга яқин абитуриент ҳужжат топширгани ва уларнинг сони кескин ошгани боис тест синовлари уч сменада ўтказилиши режалаштирилмоқда.
Агар кириш имтиҳонлари 2 сменада ташкил қилинса, 50 кунга яқин, 3 сменада бўлса, 30 кунга яқин муддатда ўтказилиши прогноз қилиняпти. Ҳозир имтиҳон учун ажратилган биноларни ҳар томонлама ўрганиш ишлари кетмоқда. Абитуриентларда тест синовлари неча сменада ўтказилиши муаммо келтириб чиқармайди. Уларнинг рухсатномаларида сменаси, санаси, соати кўрсатилади. Имтиҳон бўлиб ўтадиган биноларни аниқлаб олганимиздан кейин смена бўйича алоҳида маълумот, албатта, берилади», — деди бошқарма бошлиғи Диёрбек Қўчқоров.
Марказ расмийси Барно Ражабовнинг айтишича, абитуриентларга рухсатномалар тест синовлари бошланишидан камида 10 кун аввал берилиши кўзда тутилмоқда.
«Амалдаги тартиблар бўйича имтиҳонлар 1 августдан бошланса, абитуриентларга рухсатномалар 29 июлдан бошлаб тарқатилиши керак эди. Лекин коронавирус пандемияси ва карантин туфайли ҳозирда имтиҳон ўтказиш муддати аниқ эмас. Шу боис рухсатномаларни бериш ҳам бироз кечикади. Аммо биз режалаштиряпмизки, тест синовлари бошланишидан камида 10 кун олдин рухсатномалар берилади. Абитуриент ўз рухсатномасини ДТМ сайти орқали бемалол олиши мумкин.
Яна бир нарсани айтиш керакки, тест муддатининг орқага сурилишидан ота-оналар ва абитуриентлар фойдаланиб қолиши керак. Уларга тайёргарлик учун вақт бўляпти, бунга қўшимча имконият деб қараш лозим», — деди Ражабов.
