«Реал» ҳимоячиси Серхио Рамос Ла Лиганинг сўнгги, 38-тури доирасида ўтказилган «Леганес»га қарши ўйинда (2:2) рақиб дарвозасини ишғол этди.
Ушбу гол 34 ёшли футболчи учун клублардаги фаолияти давомида урган 100-гол бўлди. У шуларнинг 97 тасини «Реал»да, 3 тасини эса «Севилья»да урган. Қайд этиш жоиз, «Леганес»га қарши ўйин Рамос учун «Реал» сафидаги 650-ўйин бўлди.
Рамоснинг голлари мусобақалар кесимида қуйидагича жойлашган: Ла Лигада 72 та, Испания кубогида 7 та, Чемпионлар Лигасида 13 та, Испания Суперкубоги ва Европа Суперкубогида 2 тадан, клублар ўртасидаги Жаҳон чемпионатида эса 3 та.
Шунингдек, АS ва бошқа испан нашрлари Рамосни ҳимоячилар орасида Ла Лига тарихидаги энг яхши тўпурар деб ҳисоблашни таклиф қилмоқда. Бу ерда баҳсли жиҳат шундаки, «Реал» собиқ ҳимоячиси Фернандо Йерро клубдаги фаолияти давомида 100 тадан кўпроқ гол урган, бироқ у голларининг кўп қисмини (44 тасини) ярим ҳимоячи позициясида ўйнаган вақтида киритган.
Бундан ташқари, Рамос Испания терма жамоаси сафида ҳам ўз ҳисобига 21 та гол ёздириб қўйган.
Мавзуга доир:
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)