Алексис Санчес мавсум рестартидан сўнг голли узатма бериш бўйича фақат Мессидан ортда қолмоқда

«Интер» ярим ҳимоячиси Алексис Санчес А Сериянинг 34-тури доирасида ўтказилган «Рома»га қарши учрашувда (2:2) ўз номига голли узатма ёздириб қўйди.

Чилилик футболчи учун бу Европада миллий чемпионатлар қайта бошланганидан кейин еттинчи голли узатма бўлди. Ушбу кўрсаткич бўйича (кучли бешлик чемпионатларида) фақат «Барселона» ҳужумчиси Лионель Месси ундан яхшироқ натижа эга (9 та ассист).

Маълумот учун, Санчеснинг трансфер ҳуқуқи «Манчестер Юнайтед» клубига тегишли. У 2019 йилнинг август ойидан бери «Интер» сафида ижара асосида ҳаракат қилмоқда. Ижара муддати мавсум якунида ўз ниҳоясига етади.

А Сериянинг 2019/20 йилги мавсумида 31 ёшли футболчи 18 та учрашув ўтказиб, 3 та гол ва 9 та голли узатмага муаллифлик қилди.